কাম নাই, ভুগিছে মানসিক বিষণ্ণতাত; পেটৰ দায়ত ৰাস্তাত ঘূৰি ফুৰিছে জনপ্ৰিয় অভিনেত্ৰী মিতালী

কাৰ জীৱনৰ কি হ’ব কোনেও ক’ব নোৱাৰে। এসময়ত তেওঁ উদ্যোগটোৰ এটা ডাঙৰ নাম আছিল। কোনোবাই ভাবিছিলনে যে সময়ৰ লগে লগে এনেকুৱা এটা পৰিণতি হ’ব? ভোজপুৰী চলচ্চিত্ৰ জগতত মডেল হিচাপে আৰম্ভ হৈছিল তেওঁৰ যাত্ৰা। ভোজপুৰী অভিনেত্ৰী মিতালী শৰ্মাক কেৰিয়াৰৰ আৰম্ভণিতে উদ্যোগটোত অতি সম্ভাৱনাপূৰ্ণ মুখ হিচাপে গণ্য কৰা হৈছিল।

তেওঁৰ প্ৰাৰম্ভিক ছবিসমূহেই তেওঁক আটাইতকৈ বেছি স্বীকৃতি দিছিল। যিয়ে তেওঁক চলচ্চিত্ৰ নিৰ্মাতাসকলৰ বাবেও অতি চিনাকি কৰি তুলিছিল। কিন্তু সময়ৰ লগে লগে মিতালীৰ হাতত কাম কমিবলৈ ধৰিলে। এটা সময়ত মুম্বাই উদ্যোগত বৰ্তি থাকিবলৈও তেওঁ গুৰুতৰ সমস্যাৰ সন্মুখীন হ’বলগীয়া হৈছিল বুলি জনা যায়।

দিল্লীৰ বাসিন্দা মিতালী অভিনেত্ৰী হোৱাৰ সপোন লৈ মুম্বাইলৈ গৈছিল। কিন্তু এই চহৰলৈ যোৱাৰ পিছত তেওঁ পৰিয়ালৰ পৰাও বহু দূৰলৈ গুচি যায়। যাৰ বাবে তেওঁ মানসিক আৰু আৰ্থিকভাৱেও ক্ষতিগ্ৰস্ত হৈছিল। জানিব পৰা মতে উপযুক্ত উপাৰ্জনৰ অভাৱত মিতালীয়ে উদ্যোগটোৰ বিভিন্ন কামৰ পৰাও পৰি থাকিল। এটা সময়ত তেওঁ মানসিক বিষণ্ণতাত ভুগিবলৈ ধৰিলে।

তথাপি এগৰাকী অভিনেত্ৰীৰ জীৱনত এনে ঘটনা ঘটিব পাৰে সেয়া কল্পনাও কৰিব নোৱাৰি। মুম্বাইৰ লোখাণ্ডৱালা অঞ্চলৰ ৰাজপথত অতি বেদনাদায়ক অৱস্থাত ঘূৰি ফুৰা দেখা গৈছে মিতালী। আনকি বহুতে দাবী কৰিছে যে তেওঁ ভিক্ষা খুজি থকা দেখা গৈছে। তেওঁৰ প্ৰাৰম্ভিক চলচ্চিত্ৰ কেৰিয়াৰৰ তুলনাত তেওঁৰ বৰ্তমানৰ অৱস্থা দেখি মানুহ স্তম্ভিত হৈ পৰিছে।

সূত্ৰ অনুসৰি, মুম্বাই আৰক্ষীয়ে তেওঁক এনেদৰে ৰাজপথত ঘূৰি ফুৰা দেখি নিজৰ জিম্মাত লৈ যায়। থানালৈ নিয়াৰ পিছত মিতালী শৰ্মাই প্ৰথমে বিষয়াসকলক খাদ্য বিচাৰিছিল বুলি সূত্ৰৰ পৰা জানিব পৰা গৈছে। তেওঁৰ মানসিক আৰু শাৰীৰিক অৱস্থা দেখি আৰক্ষী বিষয়াসকলে তেওঁক চিকিৎসাৰ ব্যৱস্থা কৰি মানসিক স্বাস্থ্য কেন্দ্ৰত ভৰ্তি কৰে।