বিশ্বনাথত গঠন হ’ল ভাৰতবর্ষৰ প্ৰথমটো আদিবাসী ৰাজনৈতিক দল
বিশ্বনাথত গঠন হ’ল ভাৰতবৰ্ষৰ প্ৰথমটো আদিবাসী ৰাজনৈতিক দল। আজি ১০ জানুৱাৰি বৃহস্পতিবাৰে আছাৰ বিশাল গণ সমাবেশত আনুষ্ঠানিক ভাৱে এই ঘোষণা আগবঢ়ায় আছাৰ কেন্দ্ৰীয় সমিতিৰ সভাপতি প্ৰদীপ নাগে। যোৱা ২৯ ডিচেম্বৰত বিশ্বনাথত গঠন হোৱা আদিবাসী নেচনেল পাৰ্টি, অসমৰ(আনপা) সভাপতি বিজয় তাৰু আৰু সম্পাদক বলদেৱ তেলীৰ লগতে আন বিষয়ববীয়া সকলক পৰিচয় কৰাই দি সভাপতি গৰাকীয়ে এই নতুন আদিবাসী দলটোক আদিবাসী ৰাইজৰ স্বাৰ্থত কাম কৰি যাবলৈ আহ্বান জনায়।
আছাৰ নেতাগৰাকীয়ে আছাই পূৰ্বৰ দৰেই অৰাজনৈতিক চৰিত্ৰ অক্ষুন্ন ৰাখিব বুলি ঘোষণা কৰে। সভাপতি গৰাকীয়ে এই বিশাল সমাবেশত কয় যে আদিবাসীসকল অসমৰ অবিচ্ছেদ্য অংগ। আদিবাসী সকলক বাদ দি খিলঞ্জীয়াৰ ধাৰণা অমূলক। বেপাৰ কৰিবলৈ অহা সকল যদি খিলঞ্জীয়া হ’ব পাৰে কিন্তু অসমৰ হাৱা পানীৰ লগত জড়িত হোৱা আদিবাসী সকল কিয় খিলঞ্জীয়া হ’ব নোৱাৰে বুলি আদিবাসী নেতাগৰাকীয়ে যুক্তি দৰ্শায়।
আজি বিশ্বনাথ চাৰিআলিৰ লেহুগাওঁত থকা ডঃ ভূপেন হাজৰিকা কলাক্ষেত্ৰত অনুষ্ঠিত বিশাল আদিবাসী সমাৱেশত তেওঁ এই মন্তব্য আগবঢ়ায়। নেতাগৰাকীয়ে তেওঁৰ উদাত্ত ভাষণত আদিবাসীসকলক বিভিন্ন সময়ত প্ৰতাৰণা কৰি অহা বুলি উল্লেখ কৰি কয় যে ৰাজনীতিক দল সমূহৰ এনে প্ৰতাৰণৰ যোগ্য প্ৰত্যুত্তৰ দিব। চাহ বাগিচাৰ শ্ৰমিকৰ মজুৰি, বাগিচাৰ শ্ৰমিকৰ ভূমি লুণ্ঠনৰ বিৰুদ্ধে কঠোৰ সকীয়নি দিয়ে আদিবাসী নেতা গৰাকীয়ে। কেইবা সহস্ৰাধিক লোকে অংশ গ্ৰহণ কৰা এই বিশাল সমাৱেশত তেওঁ আদিবাসী সকলক অনুসূচিত জনজাতিৰ মৰ্যাদা নিদিয়া পৰ্যন্ত আন্দোলন অব্যাহত থাকিব বুলি ঘোষণা কৰে।
নিজৰ ভাষণত তেওঁ নাগৰিকত্ব সংশোধনী বিধেয়ক বাতিলৰ বাবে সংগ্ৰাম চলাই যাব বুলি মন্তব্য কৰে। সভাত আছাৰ কেন্দ্ৰীয় সমিতিৰ কাৰ্যকৰী সভাপতি জন তিৰ্কি, কেন্দ্ৰীয় সম্পাদক যোচেফ মিঞ্জ, যুটীয়া সম্পাদক বিনোদ দিগল, নুৱাছ বাৰলা, এ এ এন চিৰ সভাপতি ৰামানুজ হৰ, বি সি এফৰ যুদ্ধ বিৰতি গোটৰ সেনাধ্যক্ষ বিৰসিং মুণ্ডা, বি সি এফৰ সভাপতি দুৰ্গা হাসদা, অলনাৰ যুদ্ধ বিৰত গোটৰ সেনাধ্যক্ষ নিৰ্মল তিৰ্কী, সাধাৰণ সেনা প্ৰধান দ্বীপেন নায়ক, জিলা পৰিচালক ৰাতুল মুৰাৰী, শোণিতপুৰ জিলাৰ পৰিচালক কুৰ্বেশ্বৰ মাৰান্দী, আদিবাসী ৰাজনৈতিক দলৰ সভাপতি বিজয় তিৰু, সম্পাদক বলদেৱ তেলী, সমাজকৰ্মী অকণ শইকীয়া, প্ৰদীপ হেমৰম প্ৰমুখ্যে আছাৰ নেতৃবৃন্দ উপস্থিত থাকে।