অসমৰ নিৰ্বাচনত ৩৯ শতাংশ প্ৰাৰ্থী কোটিপতি; বিজেপিৰ ৮৮শতাংশ, কংগ্ৰেছৰ ৬১ শতাংশ
অসমৰ নিৰ্বাচনত প্ৰতিদ্বন্দ্বিতা কৰা প্ৰাৰ্থীসকলৰ ধন-সম্পত্তিৰ তালিকাই এইবাৰ সকলোৰে দৃষ্টি আকৰ্ষণ কৰিছে। ২০২৬ চনৰ বিধানসভা নিৰ্বাচনত প্ৰতিদ্বন্দ্বিতা কৰা প্ৰতি ১০ জন প্ৰাৰ্থীৰ ভিতৰত প্ৰায় ৪ জনেই এক কোটি টকাৰ ওপৰত সম্পত্তি ঘোষণা কৰিছে। এছ’চিয়েশ্যন ফৰ ডেম’ক্ৰেটিক ৰিফৰ্মছ (এডিআৰ)ৰ এক বিশ্লেষণত প্ৰকাশ পাইছে এই তথ্য।
মঙলবাৰে সদৰী কৰা প্ৰতিবেদনত প্ৰকাশ পাইছে যে সকলো ৭২২ প্ৰাৰ্থীৰ স্বঘোষিত শপতনামাৰ ভিত্তিত ২৮৫ জন প্ৰতিযোগী বা ৩৯ শতাংশ কোটিপতিৰ শ্ৰেণীত পৰে।
২০২১ চনৰ বিধানসভা নিৰ্বাচনৰ তুলনাত এই সংখ্যা বহুখিনি বৃদ্ধি পাইছে, য’ত ২৮ শতাংশ প্ৰাৰ্থীয়ে ১ কোটি টকাৰ ওপৰত সম্পত্তি ঘোষণা কৰিছিল। এইটোৱে ৰাজ্যখনৰ নিৰ্বাচনী ৰাজনীতিত ধন ক্ষমতাৰ ক্ৰমবৰ্ধমান প্ৰভাৱৰ কথাকে প্ৰতিফলিত কৰিছে।
প্ৰাৰ্থীৰ বিত্তীয় স্থিতিৰ ক্ৰমবৰ্দ্ধমান বৃদ্ধিৰ দিশটোকো ই আঙুলিয়াই দিয়ে। ২০২১ চনত ২.১০ কোটি টকাৰ তুলনাত ২০২৬ চনত প্ৰতিজন প্ৰাৰ্থীৰ গড় সম্পত্তি ৩.২৫ কোটি টকা। সামূহিকভাৱে ৭২২ গৰাকী প্ৰাৰ্থীয়ে ২৩৫২ কোটি টকাৰ মুঠ সম্পত্তি ঘোষণা কৰিছে।
ইপিনে, প্ৰায় ১৩ শতাংশ প্ৰাৰ্থীয়ে ৫ কোটি টকাতকৈ অধিক সম্পত্তি ঘোষণা কৰিছে, আনহাতে ১৫ শতাংশ প্ৰাৰ্থী ২ কোটিৰ পৰা ৫ কোটি টকাৰ ভিতৰত আছে।
আন ২৪ শতাংশ লোকৰ সম্পত্তি ৫০ লাখৰ পৰা ২ কোটি টকাৰ ভিতৰত, আৰু ২৩ শতাংশ লোকৰ সম্পত্তি ১০ লাখৰ পৰা ৫০ লাখ টকাৰ ভিতৰত। তলৰ পিনে ২৫শতাংশ প্ৰাৰ্থীয়ে ১০ লাখ টকাৰ তলৰ সম্পত্তি ঘোষণা কৰিছে, যিয়ে নিৰ্বাচনী ক্ষেত্ৰখনৰ ভিতৰত তীব্ৰ বৈষম্যক প্ৰতিফলিত কৰিছে।
বিশেষকৈ প্ৰধান ৰাজনৈতিক দলসমূহৰ মাজত ধনৰ প্ৰভাৱ স্পষ্ট। বিজেপিৰ প্ৰাৰ্থীৰ ভিতৰত ৯০ৰ ভিতৰত ৭৯ অৰ্থাৎ ৮৮ শতাংশই কোটিপতি।
ইয়াৰ পিছতে কংগ্ৰেছৰ ৯৯ জন প্ৰাৰ্থীৰ ভিতৰত ৬০ জন অৰ্থাৎ ৬১ শতাংশ প্ৰাৰ্থীৰ বিপৰীতে এ আই ইউ ডি এফৰ ৩০ জন প্ৰাৰ্থীৰ ভিতৰত ১৬ জন বা ৫৩ শতাংশই ১ কোটি টকাৰ ওপৰৰ সম্পত্তি ঘোষণা কৰিছে।
এইবাৰ নিৰ্বাচনত শীৰ্ষ তিনিগৰাকী ধনী প্ৰাৰ্থী
হাইলাকান্দি সমষ্টিৰ কংগ্ৰেছ প্ৰাৰ্থী ৰাহুল ৰয়ে ২৬১ কোটিৰো অধিক সম্পত্তিৰে প্ৰথম স্থানত আছে। তেওঁৰ পিছতে বিন্নাকান্দিৰ পৰা প্ৰতিদ্বন্দ্বিতা কৰা এআইইউডিএফৰ মুৰব্বী মৌলানা বদৰুদ্দিন আজমলে ২২৬ কোটি টকাৰ অধিক সম্পত্তি ঘোষণা কৰিছে।
তৃতীয় স্থানত আছে ৰঙানদীৰ কংগ্ৰেছ প্ৰাৰ্থী জয়ন্ত খাউণ্ড, যাৰ সম্পত্তিৰ পৰিমাণ ৬৭ কোটিৰো অধিক।
আনহাতে, দুজন প্ৰাৰ্থীয়ে শূন্য সম্পত্তি ঘোষণা কৰাৰ বিপৰীতে আন কেইবাজনো প্ৰাৰ্থীয়ে মাত্ৰ কেইশ বা হাজাৰ টকাৰ সম্পত্তিৰ ঘোষণা দিছে, যিয়ে নিৰ্বাচনী যুঁজত থকাসকলৰ মাজত থকা ব্যাপক অৰ্থনৈতিক ব্যৱধানৰ ছবি দাঙি ধৰিছে।