৭ সাংসদৰ পিছত এইবাৰ ২৮ বিধায়ক! পঞ্জাবত আপ চৰকাৰত ভাঙোনৰ ইংগিত

ৰাজ্যসভাত এতিয়া আম আদমি পাৰ্টিৰ বাবে সংকটৰ সময় আহি পৰিছে। একেলগে সাতগৰাকী সাংসদে বিজেপিত যোগদান কৰাৰ ফলত ৰাজ্যসভাত আপৰ সাংসদৰ সংখ্যা এতিয়া মাত্ৰ তিনিজনলৈ হ্ৰাস পাইছে। এই পৰিস্থিতিৰ মাজতে পঞ্জাবত আপ চৰকাৰ ভাঙি যোৱাৰ সম্ভাৱনাই দেখা দিছে। শেহতীয়াকৈ হাৰিয়ানাৰ আপৰ প্ৰাক্তন ৰাজ্যিক সভাপতি নবীন জয়হিন্দে দাবী কৰিছে যে পঞ্জাবৰ ২৮ গৰাকী বিধায়কে একেলগে দল ত্যাগ কৰাৰ সম্ভাৱনা আছে। তেওঁৰ মতে পঞ্জাবত আম আদমি পাৰ্টিৰ ভিতৰচৰাত অসন্তুষ্টিয়ে চৰম পৰ্যায় পাইছেগৈ।

জয়হিন্দৰ এই দাবীয়ে পঞ্জাবৰ ৰাজনীতিত তীব্ৰ চাঞ্চল্যৰ সৃষ্টি কৰিছে। তেওঁ অভিযোগ কৰিছে যে যি সকল সাংসদে দল এৰিছে তেওঁলোকৰ সৈতে অতি বেয়া ব্যৱহাৰ কৰা হৈছিল আৰু আনকি কেইবাজনকো মাৰধৰ পৰ্যন্ত কৰা হৈছে। এই ঘটনাসমূহৰ বাবে দলটোৰ ভিতৰত বিদ্ৰোহৰ জুই জ্বলিছে। জয়হিন্দৰ মতে এই পৰিস্থিতি কেৱল ৰাজ্যসভাতে সীমাবদ্ধ হৈ থকা নাই, ই এতিয়া পঞ্জাব বিধানসভালৈও বিয়পি পৰিছে। ২৮ গৰাকী বিধায়কে ইতিমধ্যে দল ত্যাগ কৰাৰ বাবে প্ৰস্তুতি আৰম্ভ কৰিছে বুলি তেওঁ উল্লেখ কৰিছে।

ইফালে সকলো জল্পনা-কল্পনাৰ অন্ত পেলাই ৰাঘৱ চাড্ডাই কালি বিজেপিত যোগদান কৰিছে। তেওঁৰ সৈতে আম আদমি পাৰ্টিৰ আন ছয়গৰাকী নেতাও গেৰুৱা শিবিৰত চামিল হৈছে। ৰাঘৱ চাড্ডাই জানিবলৈ দিয়া মতে স্বাতী মালিৱাল, হৰভজন সিং, অশোক মিত্তল, সন্দীপ পাঠক, ৰাজিন্দৰ গুপ্তা আৰু বিক্ৰম সাহানীয়েও বিজেপিত নাম লিখাইছে। ইয়াৰ অৰ্থ হ’ল আপৰ মুঠ ১০ গৰাকী ৰাজ্যসভাৰ সাংসদৰ ভিতৰত সাতগৰাকীয়েই এতিয়া বিজেপিৰ অংশ। এই ঘটনাই দলটোৰ অন্তৰ্কন্দল স্পষ্ট কৰি তুলিছে।

ৰাজনৈতিক সংকটৰ মাজতে আপৰ পঞ্জাবৰ তত্ত্বাৱধায়ক মণীষ চিছোদিয়াই শুকুৰবাৰে গুজৰাটৰ পৰা উভতি আহি দিল্লী বিমানবন্দৰৰ পৰা পোনপটীয়াকৈ অৰবিন্দ কেজৰিৱালক সাক্ষাৎ কৰিবলৈ যায়। আনহাতে পঞ্জাবৰ মন্ত্ৰী বলবীৰ সিঙে শনিবাৰে পুৱা দিল্লীত চিছোদিয়াক লগ কৰে। এই সাক্ষাৎকালত বলবীৰ সিঙে অভিযোগ কৰে যে বিজেপিয়ে পঞ্জাবত অপাৰেচন লোটাস চলাইছে আৰু সাংসদসকলে পঞ্জাবৰ জনসাধাৰণৰ সৈতে বিশ্বাসঘাটকতা কৰিছে। নবীন জয়হিন্দৰ শেহতীয়া দাবীয়ে পঞ্জাবৰ ৰাজনৈতিক মহলত অস্থিৰতা আৰু অধিক বৃদ্ধি কৰিছে।