এটা দশকৰ পাছত লালকিল্লাত স্বাধীনতা দিৱসৰ অনুষ্ঠানত বিৰোধী দলপতি! কিন্তু ৰাহুল গান্ধীৰ আসনক লৈ প্ৰশ্ন নেটিজেনৰ

এক দশকৰ পাছত পুনৰ লালকিল্লাত স্বাধীনতা দিৱসৰ অনুষ্ঠানত বিৰোধী দলপতিৰ আসনখন ঘূৰি আহিল। এতিয়া সেই স্থানত আছে ৰাহুল গান্ধী। বিৰোধী দলপতিৰ পদ পূৰ্ণ মন্ত্ৰীৰ সমতুল্য। কিন্তু বৃহস্পতিবাৰে স্বাধীনতা দিৱসৰ অনুষ্ঠানৰ সময়ত তেওঁৰ আসন ক’ত দিছিল সেই সন্দৰ্ভত বিতৰ্ক হৈছে।

বৃহস্পতিবাৰে পুৱা লালকিল্লাত স্বাধীনতা দিৱসৰ অনুষ্ঠানত ভাষণ প্ৰদান কৰে প্ৰধানমন্ত্ৰী নৰেন্দ্ৰ মোদীয়ে। এই অনুষ্ঠানত লোকসভাৰ বিৰোধী দলৰ নেতা ৰাহুলও উপস্থিত থাকে। লালকিল্লাত দেখা ছবিখনত ৰাহুলে আগশাৰীৰ অতিথি আসনত স্থান নাপালে। ‘ইণ্ডিয়া টুডে’ত প্ৰকাশিত এক বাতৰি অনুসৰি তেওঁক পিছৰ শাৰীত বহিবলৈ দিয়া হৈছিল।

সন্মুখৰ শাৰীত আছিল অলিম্পিকৰ পদক বিজয়ী মনু ভাকেৰ, সৰবজোত সিং। ভাৰতীয় অলিম্পিক পদক বিজয়ী হকী দলৰ অধিনায়ক হৰমনপ্ৰীত সিং আৰু পি আৰ শ্ৰীজেশেও ৰাহুলৰ আগশাৰীত বহিছিল। বহাৰ ব্যৱস্থা, বিশেষকৈ স্বাধীনতা দিৱসৰ অনুষ্ঠানত ৰাহুলৰ আসন সন্দৰ্ভত বিভিন্ন মহলত প্ৰশ্ন উত্থাপন হ’বলৈ আৰম্ভ কৰিছে।

নিয়ম অনুসৰি বিৰোধী দলৰ নেতাৰ সন্মুখৰ শাৰীত আসন থাকিব লাগে। এই প্ৰথা বিগত সময়তো বিজেপি শাসনৰ সময়তো চলি আছিল। অটল বিহাৰী বাজপেয়ীৰ যুগত যেতিয়া ছোনিয়া গান্ধী বিৰোধীৰ নেত্ৰী আছিল তেতিয়া তেওঁক সদায় আগশাৰীত বহিবলৈ দিয়া হৈছিল। কিন্তু বৃহস্পতিবাৰৰ অনুষ্ঠানত উচ্চতম ন্যায়ালয়ৰ মুখ্য ন্যায়াধীশ ডি ৱাই, কেন্দ্ৰীয় গৃহমন্ত্ৰী অমিত শ্বাহ, কেন্দ্ৰীয় বিত্তমন্ত্ৰী নিৰ্মলা সীতাৰমণ, বৈদেশিক পৰিক্ৰমা মন্ত্ৰী এছ জয়শংকৰ সন্মুখৰ শাৰীত বহি থকাৰ সময়তে ৰাহুলে যথেষ্ট পিছফালে বহিছিল।

মন কৰিবলগীয়া যে, স্বাধীনতা দিৱসৰ কাৰ্যসূচী আয়োজন কৰাৰ দায়িত্ব প্ৰতিৰক্ষা মন্ত্ৰালয়ৰ। ইণ্ডিয়া টুডেৰ প্ৰতিবেদনত প্ৰতিৰক্ষা মন্ত্ৰালয়ৰ এক সূত্ৰৰ উদ্ধৃতিৰে প্ৰকাশ কৰা হৈছে যে সাধাৰণতে বিৰোধী দলৰ নেতাক আগশাৰীৰ আসন দিয়া হয়। কিন্তু অলিম্পিকত পদক বিজয়ীসকলৰ বাবে সংৰক্ষিত আছিল সন্মুখৰ শাৰীৰ আসন। গতিকে বিৰোধী নেতাৰ আসনখন পিছলৈ লৈ যাব লগা হ’ল।