মোডীৰ সকীয়নিৰ পিছতো পুনৰ জম্মু-পঞ্জাৱৰ একাধিক স্থানত ড্ৰ’ন আক্ৰমণৰ চেষ্টা পাকিস্তানৰ!

সোমবাৰে নিশা দেশবাসীক সম্বোধন কৰি প্ৰধানমন্ত্ৰী মোদীয়ে স্পষ্ট কৰি দিয়ে যে ভাৰতে সন্ত্ৰাসবাদীৰ ৰঙাচকু সহ্য নকৰে। মোদীয়ে স্পষ্টকৈ কয় যে, ‘যদি পাকিস্তানৰ সৈতে কথা হয়, তেন্তে এইবাৰ আমি কেৱল সন্ত্ৰাসবাদ আৰু পাকিস্তান অধিকৃত কাশ্মীৰকলৈহে কথা পাতিম।’

সংবাদ সংস্থাৰ সূত্ৰ অনুসৰি ভাৰতৰ প্ৰধানমন্ত্ৰীৰ ভাষণৰ কিছু সময়ৰ পিছতে পাকিস্তানে পুনৰ জম্মু-পঞ্জাৱৰ একাধিক স্থানত ড্ৰ’ন আক্ৰমণৰ চেষ্টা চলায়। যোৱা কেইদিনমানৰ দৰে সোমবাৰে নিশাও ভাৰতীয় সেনাই আকাশতে সেইবোৰ ধ্বংস কৰে। কিন্তু সমগ্ৰ ঘটনাই পুনৰ সংশ্লিষ্ট অঞ্চলসমূহত নতুনকৈ চাঞ্চল্যৰ সৃষ্টি কৰে।

সংবাদ সংস্থাৰ সূত্ৰ অনুসৰি সোমবাৰে নিশা ৯ বজাৰ পিছত পঞ্জাৱৰ জলন্ধৰ আৰু উধামপুৰৰ নৰ্দাৰ্ণ কমাণ্ড আৰু এয়াৰ ফৰ্চ ষ্টেচনৰ ওপৰত ১৫খন ড্ৰোন উৰি থকা দেখা গৈছিল। লগে লগে আকাশতে সেইবোৰ নিষ্ক্ৰিয় কৰা হয়। জলন্ধৰ আৰু চাম্বাত বিস্ফোৰণৰ শব্দও শুনা গৈছিল বুলি সূত্ৰই দাবী কৰিছে।

সামৰিক সূত্ৰৰ মতে বৰ্তমান পৰিস্থিতি নিয়ন্ত্ৰণত আছে। আতংকিত হোৱাৰ কোনো কাৰণ নাই। সমগ্ৰ অঞ্চলটোত বাহিনীৰ কঠোৰ নিৰীক্ষণ আছে। নিৰাপত্তাজনিত কাৰণত সংশ্লিষ্ট অঞ্চলসমূহ ব্লেকআউট কৰা হৈছে।

উল্লেখ্য যে সোমবাৰে দিয়া দীঘলীয়া ভাষণত মোদীয়ে স্পষ্টকৈ কয় যে সন্ত্ৰাসবাদৰ বিষয়টোত কোনো ধৰণৰ ৰেহাই দিয়া নহ’ব আৰু প্ৰয়োজন হ’লে উপযুক্ত উত্তৰ দিয়া হ’ব। মোডীৰ ভাষাত “সন্ত্ৰাসবাদ আৰু আলোচনা একেলগে আগবাঢ়িব নোৱাৰে। সন্ত্ৰাসবাদ আৰু বাণিজ্য একেলগে চলিব নোৱাৰে। পানী আৰু তেজ একেলগে বৈ যাব নোৱাৰে।”

অৰ্থাৎ সন্ত্ৰাসবাদৰ বিষয়ত ভাৰত শূন্য সহনশীলতাৰ পথৰ পৰা বিচ্যুত নহ’ব। পাকিস্তানে যদি বৰ্তি থাকিব বিচাৰে তেন্তে এতিয়াই সন্ত্ৰাসবাদৰ পথৰ পৰা আঁতৰি আহিব লাগিব। ইফালে এই আক্রমণৰ ঘটনা পোহৰলৈ অহাত বিষয়টোক লৈ নতুনকৈ প্ৰতিক্ৰিয়াৰ সৃষ্টি হৈছে৷