কৰ’না আক্ৰান্তৰ অন্তিম সৎকাৰৰ প্ৰস্তুতিৰ মাজতেই আহিল সেই খৱৰ; হতবাক পৰিয়ালৰ লোক

কৰ’নাৰ দ্বিতীয়টো ঢৌৱে বিশ্বৰ অন্যান্য প্ৰান্তৰ লগতে ভাৰততে আতংকৰ সৃষ্টি কৰিছে। বিশেষকৈ মহাৰাষ্ট্ৰত কৰ’নাৰ সংক্ৰমণ পুনৰ কল্পনাতীতভাৱে বৃদ্ধি পাইছে।

মহাৰাষ্ট্ৰৰ নাগপুৰত এগৰাকী মহিলা কৰ’না আক্ৰান্ত হৈ হাস্পাতলত ভৰ্তি হৈছিল। হাস্পাতলত ভৰ্তি হোৱাৰ ২৪ ঘন্টাৰ ভিতৰতেই তেওঁক হাস্পাতলখনে মৃত বুলি ঘোষণা কৰে।

এই খৱৰ পৰিয়ালৰ লোকক জনোৱা হয়। কিন্তু তাৰ কিছুসময় পাছতেই মহিলাগৰাকীৰ পৰিয়াললৈ আহে আন এক খৱৰ। এই খৱৰ শুনি পৰিয়ালৰ লোকসকলৰ মূৰত যেন সৰগ ভাগি পৰিল।

শুকুৰবাৰে উশাহ-নিশাহত কষ্টি পোৱা নাগপুৰৰ ৬৩বছৰীয়া এগৰাকী মহিলাক হাস্পাতললৈ লৈ যোৱা হয়। শনিবাৰে হাস্পাতলৰ ফালৰ পৰা পৰিয়ালক ফোন কৰি জনোৱা হয় যে ৰোগীৰ মৃত্যু হৈছে।

স্বাভাৱিকতেই এনে খৱৰ লাভ কৰি পৰিয়ালৰ লোকসকল শোকত ভাগি পৰে। অৱশেষত তেওঁলোকে অন্তিম সৎকাৰৰ বাবে প্ৰস্তুতিও চলায়।

ইয়াৰ মাজতে হাস্পাতলৰ পৰা মহিলাগৰাকীৰ পৰিয়াললৈ পুনৰ এবাৰ ফোন আহিল। এইবাৰ দিয়া হ’ল সুখৱৰটো।

ফোনটো লৈয়েই মহিলাগৰাকীৰ পৰিয়ালৰ লোকসকল হতবাক হৈ পৰে আৰু ততাতয়াকৈ হাস্পাতললৈ ঢাপলি মেলে।

হাস্পাতলৰ পৰা কোৱা হয় যে মহিলাগৰাকীৰ মৃত্যু হোৱা নাই। তেওঁলোকে ভুল কৰি মৃত্যু হোৱা বুলি ভাৱিছিল।

মহিলাগৰাকীৰ পৰিয়ালৰ লোকে ইয়াৰ পাছত লগে লগেই গৈ হাস্পাতালত উপস্থিত হ’ল। তাত গৈ জানিব পৰাৰে যে তেওঁৰ আনকি মৃত্যুৰ প্ৰমানপত্ৰও প্ৰস্তুত হৈ গৈছিল।

পৰিয়ালৰ লোকে মহিলাগৰাকীক আৰু সেইখন হাস্পাতলত ৰখাৰ ‘ৰিস্ক’ লব নিবিচাৰিলে। লগে লগে আন এখন হাস্পাতললৈ স্থানান্তৰিত কৰা হয় ৰোগীগৰাকীক।