অগপ অসমত হাঁহিয়াতৰ পাত্ৰ হৈ পৰিছে : ৰঞ্জিত কুমাৰ দাস

পঞ্চায়ত নিৰ্বাচনৰ পাছতে অগপ-বিজেপিৰ মিত্ৰতা ভংগ হ’ব পাৰে। চৰকাৰত থাকিও ৰাজ্য চৰকাৰৰ কাম-কাজক সমালোচনা কৰা অগপৰ বিৰুদ্ধে দলৰ ৰাষ্ট্ৰীয় সভাপতি অমিত শ্বাহলৈ ইতিমধ্যে ৰাজ্যিক বিজেপিয়ে প্ৰতিবেদন প্ৰেৰণ কৰিছে। অৱশ্যে বিজেপিৰ কেন্দ্ৰীয় নেতৃত্বইহে মিত্ৰতা ভংগৰ চূড়ান্ত সিদ্ধান্ত গ্ৰহণ কৰিব।

সংবাদ মাধ্যমৰ আগত শনিবাৰে এই গুৰুত্বপূৰ্ণ মন্তব্য কৰিছে বিজেপিৰ ৰাজ্যিক সভাপতি ৰঞ্জিত কুমাৰ দাসে। তেওঁ কয় যে বিজেপিৰ কেন্দ্ৰীয় নেতৃত্বৰ নিৰ্দেশতহে অসমত অগপৰ সৈতে মিত্ৰতা হৈছিল। সোয়েহে মিত্ৰতা ভংগৰ সিদ্ধান্ত কেন্দ্ৰীয় নেতৃত্বইহে ল’ব পাৰিব। পঞ্চায়ত নিৰ্বাচনৰ পাছতে এই বিষয়ে অমিত শ্বাহক সাক্ষাৎ কৰাৰ কথাও দাসে জানিবলৈ দিয়ে।

মিত্ৰতাৰ প্ৰসংগত অগপৰ অৱদান সন্দৰ্ভত ব্যাখ্যা আগবঢ়াই ৰাজ্যিক সভাপতিগৰাকীয়ে কয় যে বিগত লোক সভাৰ নিৰ্বাচনত অগপৰ সৈতে মিত্ৰতা নথকা সত্ত্বেও বিজেপিয়ে সাতখন আসন লাভ কৰিছিল। আনহাতে, বিধানসভাৰ নিৰ্বাচনত বিজেপিয়ে ৬৯খন আসন লাভেৰে প্ৰথম স্থানত আছিল। গতিকে, অগপৰ সৈতে মিত্ৰতা ভংগ হ’লেও বিজেপিৰ ক্ষতি নহয়।

তেওঁ লগতে কয়, ‘’চৰকাৰৰ অংশীদাৰ হৈ থাকিও বিজেপি চৰকাৰৰ দিনত নিৰ্মাণ কৰা পথ উদ্বোধন কৰি অগপ নেতৃত্বই বিজেপি চৰকাৰক গালি পাৰে।‘’ এই সন্দৰ্ভত তেওঁ কেন্দ্ৰীয় নেতৃত্বক তথ্যসহ অৱগত কৰিব বুলিও জানিবলৈ দিয়ে।

অসমৰ ৰাইজ চৰকাৰৰ কাম-কাজত সন্তুষ্ট বুলি ব্যক্ত কৰি পঞ্চায়ত নিৰ্বাচনত বিজেপিয়ে সৰ্বাধিক ভোট লাভ কৰিব বুলিও দাসে দাবী কৰে।

ৰাজ্যিক সভাপতিগৰাকীয়ে লগতে কয় যে বদৰুদ্দিন আজমলক প্ৰত্যাখ্যান কৰি নামনি অসমত ধৰ্মীয় সংখ্যালঘু ভোটাৰেও আনকি বিজেপিক আদৰি লৈছে। ইপিনে,পঞ্চায়ত নিৰ্বাচনৰ পাছতে অগপ যে অসমত হাঁহিয়াতৰ পাত্ৰ হৈছে সেয়া স্পষ্ট হৈ পৰিব বুলি অগপক কটাক্ষ কৰে।