ঘৰ ভাঙিছে অগপৰ; অগপ ত্যাগ কৰি কংগ্ৰেছৰ পৰা কমলপুৰত প্ৰতিদ্বন্দ্বিতা কৰিব সত্যব্ৰত কলিতাই!

আসন্ন ২০২১ৰ অসম বিধানসভা নিৰ্বাচনৰ পূৰ্বে কমলপুৰ সমষ্টিৰ বিধায়ক সত্যব্ৰত কলিতাই শনিবাৰে অসম গণ পৰিষদৰ পৰা পদত্যাগ কৰিছে।তেওঁ শীঘ্ৰেই কংগ্ৰেছত যোগদান কৰাৰ সম্ভাৱনা আছে।

বৰ্তমান প্ৰতিনিধিত্ব কৰি থকা কমলপুৰ সমষ্টিৰ পৰা প্ৰতিদ্বন্দ্বিতা কৰিবলৈ অগপই টিকট নিদিয়াৰ পাছতে কলিতাই দলটোৰ পৰা পদত্যাগ কৰে।

কমলপুৰ সমষ্টিৰ পৰা এইবাৰ মিত্ৰজোঁটৰ প্ৰাৰ্থী হিচাপে প্ৰতিদ্বন্দ্বিতা কৰিব বিজেপিৰ দিগন্ত কলিতাই।

শনিবাৰে গধূলি দলৰ সভাপতি তথা কৃষিমন্ত্ৰী অতুল বৰাক সাক্ষাৎ কৰাৰ পাছতে সত্যব্ৰত কলিতাই অগপৰ পৰা পদত্যাগ কৰে।

সংবাদমাধ্যমৰ আগত কলিতাই কয়,’’ মই সভাপতি অতুল বৰাৰ সৈতে হোৱা বৈঠকৰ পাছতে অগপৰ পৰা পদত্যাগ কৰিছো। কাইলৈ মই মোৰ নতুন ৰাজনৈতিক যাত্ৰাৰ বিষয়ে সদৰী কৰিম।‘’

আনহাতে, অগপৰ সভাপতি অতুল বৰাই কয় যে তেওঁৰ দলে বিজেপিয়ে দিগন্ত কলিতাক প্ৰাৰ্থিত্ব দিয়া কমলপুৰ সমষ্টিত বন্ধুত্বপূৰ্ণ প্ৰতিদ্বন্দ্বিতা আগবঢ়াব।

বাতৰি অনুসৰি, সত্যব্ৰত কলিতাই শীঘ্ৰেই কংগ্ৰেছত যোগদান কৰি কমলপুৰ সমষ্টিৰ পৰাই আসন্ন বিধানসভাৰ নিৰ্বাচনত প্ৰতিদ্বন্দ্বিতা আগবঢ়াব।

জানিব পৰা মতে, গুৱাহাটীৰ এখন হোটেলত তেওঁ ইতিমধ্যে কংগ্ৰেছ দলৰ নেতৃত্বৰ সৈতে বৈঠকত মিলিত হৈছে।

প্ৰাক্তন মুখ্যমন্ত্ৰী তথা বঢ়মপুৰ সমষ্টিৰ বিধায়ক প্ৰফুল্ল কুমাৰ মহন্তক টিকটৰ পৰা বঞ্চিত কৰাৰ লগতে কমলপুৰৰ বিধায়ক সত্যব্ৰত কলিতাকো অগপই টিকট নিদিয়াত এতিয়া দুয়োজনেই দলৰ বিৰুদ্ধে নিৰ্বাচনত অৱতীৰ্ণ হোৱাটো নিশ্চিত হৈ পৰিছে।

অতুল বৰাৰ নেতৃত্বত অগপৰ স্থিতি থৰক-বৰক হোৱাই নহয়, এতিয়া অগপৰ সিদ্ধান্তসমূহো বিজেপিৰ হাইকমাণ্ডৰ দ্বাৰা নিয়ন্ত্ৰিত হোৱাৰ অভিযোগ উঠিছে।