বিজেপি মিত্ৰজোঁটত অসন্তুষ্টি: অতুল বৰা মুৰ্দাবাদ, RSS মুৰ্দাবাদ ধ্বনিত কঁপিল বিশ্বনাথ

অতুল বৰা মুৰ্দাবাদ, RSS মুৰ্দাবাদ ধ্বনিত কঁপিল বিশ্বনাথ।প্ৰাৰ্থিত্বকেন্দ্ৰীক সংঘাতে  আজি বিশ্বনাথত তীব্ৰতৰ ৰূপ ধাৰণ কৰা পৰিলক্ষিত হয়।অগপৰ বিশ্বনাথ সমষ্টিৰ টিকট বঞ্চিত প্ৰাক্তন বিধায়ক প্ৰবীন হাজৰিকাৰ সমৰ্থকসকলে আজি কঁপাই তোলে বিশ্বনাথ চহৰ।

‘৭৬ নং বিশ্বনাথ বিধান সভা সমষ্টিটো RSS ৰ চাপ মৰা সমষ্টি ।গতিকে RSS ৰ আসনত অকল RSS য়ে ভোট দিয়ক’। এই মন্তব্য অগপৰ বিশ্বনাথ সমষ্টিৰ টিকট বঞ্চিত প্ৰাক্তন বিধায়ক প্ৰবীন হাজৰিকাৰ।

আজি বিশ্বনাথ জিলাৰ অগপ কাৰ্যালয়ত অনুষ্ঠিত এক দলীয় সভাত অগপৰ প্ৰাক্তন বিধায়ক প্ৰবীণ হাজৰিকাই অভিযোগ কৰে যে একমাত্ৰ RSS ৰ বাবেই দলীয় প্ৰাৰ্থিত্ব পোৱাৰ পৰা বঞ্চিত হল অগপ।

নতুন দিল্লীত ৰাষ্ট্ৰীয় নেতৃত্বৰ লগত হোৱা আলোচনাত বি এল সন্তুোষ নামৰ RSS ৰ নেতা জনে বিশ্বনাথ সমষ্টিৰ আসন খন RSS ৰ আসন বুলি দাবী কৰি এই আসন কোনো কাৰণতে অগপক এৰি দিয়া নহব বুলি কৈ বিশ্বনাথ সমষ্টিৰ আসনখন বিজেপিৰ প্ৰাৰ্থিত্ব প্ৰদান কৰিলে।

সেই কথা আজি অগপৰ প্ৰাক্তন বিধায়ক গৰাকীয়ে ৰাজহুৱা ভাবে ঘোষণা কৰে আৰু গৰজি উঠি হাজৰিকাই কয় যে যদি বিশ্বনাথৰ এই আসনখন RSS ৰে আসন হয়, তেনেহলে RSS ৰ আসনত কেৱল RSS ৰ লোকেই ভোট দিয়ক।

প্ৰাক্তন বিধায়ক গৰাকীয়ে এই কথা উল্লেখ কৰাৰ লগে লগে অগপৰ কাৰ্যালয়ৰ চৌদিশে RSS মুৰ্দাবাদ ধ্বনি শুনা গল।

আনহাতে অগপ কৰ্মী সকলে অতুল বৰা মুৰ্দাবাদ ধ্বনিও দিয়ে।

সকলো দলীয় নেতা কৰ্মীয়ে প্ৰাক্তন অগপ বিধায়ক হাজৰিকাক বিশ্বনাথ বিধান সভাৰ পৰা নিৰ্দলীয় ভাবে প্ৰতিদ্বন্দ্বিতা কৰিবলৈও দাবী জনায় আৰু প্ৰাক্তন বিধায়ক গৰাকীও এই দাবীক সন্মান জনাই মাত্ৰ আজিৰ দিনটোৰ সময় বিচাৰিলে এই প্ৰস্তাব চিন্তা কৰাৰ বাবে।

এই সভাতে প্ৰাক্তন বিধায়ক হাজৰিকাই কয় যে মন্ত্ৰী হিমন্ত বিশ্ব শৰ্মাই বিশ্বনাথৰ আসনখন অগপৰ হৈ প্ৰবীণ হাজৰিকাক এৰি দিয়াৰ বাবে কেন্দ্ৰীয় নেতৃবৰ্গক কৈছিল যদিও RSS নেতা বি এল সন্তোষে বিশ্বনাথৰ আসন খন RSS ৰ বুলি দাবী কৰে আৰু বি এল সন্তোষৰ কথা পেলাব নোৱাৰি অৱশেষত বিজেপিৰ প্ৰমোদ বৰঠাকুৰক বিশ্বনাথত টিকট প্ৰদান কৰে।

উল্লেখ্য যে ২০১৬ চনৰ পুৰ্বে বিশ্বনাথ সমষ্টিৰ বিধায়ক হিচাপে অগপৰ বিধায়ক প্ৰবীন হাজৰিকাই মিত্ৰ জোঁটৰ খাতিৰত ২০১৬ চনত বিশ্বনাথ বিধান সভা সমষ্টি বিজেপিক এৰি দিছিল ।

সেই সময়তে মন্ত্ৰী হিমন্ত বিশ্ব শৰ্মাই অগপৰ প্ৰবীণ হাজৰিকাক প্ৰতিশ্ৰুতি প্ৰদান কৰিছিল যে ২০২‍১ চনৰ বিধান সভা নিৰ্বাচনত বিশ্বনাথৰ আসনখন পুনৰ অগপক ওভতাই দিয়া হব বুলি।কিন্তু কাৰ্যক্ষেত্ৰত সেইয়া নহল।যাৰ বাবে এতিয়া বিশ্বনাথ অগপত মিত্ৰজোঁটৰ বিৰুদ্ধে বিদ্ৰোহৰ উকমুকনি আৰম্ভ হৈছে।

ইফালে যদিহে প্ৰবীণ হাজৰিকাই নিৰ্দলীয় ৰূপে প্ৰাৰ্থিত্ব আগবঢ়াই তেন্তে বিশ্বনাথৰ ৰাজনৈতিক সমীকৰণ সলনি হোৱাৰ সম্ভাৱনা আছে।