শীঘ্ৰেই অন্ত পৰিব লাখ লাখ শিক্ষাৰ্থীৰ অপেক্ষা : ২৮ এপ্ৰিলত ঘোষণা হ’ব উচ্চতৰ মাধ্যমিকৰ ফলাফল
অসম উচ্চতৰ মাধ্যমিক শিক্ষা সংসদৰ দ্বাৰা পৰিচালিত চলিত বৰ্ষৰ দ্বাদশ শ্ৰেণীৰ পৰীক্ষাৰ ফলাফল অহা ২৮ এপ্ৰিলত ঘোষণা কৰা হ’ব। ৰাজ্যৰ মুখ্যমন্ত্ৰী ড০ হিমন্ত বিশ্ব শৰ্মাই সামাজিক মাধ্যমৰ যোগেদি এই গুৰুত্বপূৰ্ণ ঘোষণা কৰি পৰীক্ষাৰ্থীসকললৈ আগতীয়াকৈ শুভেচ্ছা জ্ঞাপন কৰিছে।
শেহতীয়া তথ্য অনুসৰি ২৮ এপ্ৰিলত ফলাফল ঘোষণা হোৱাৰ পিছতে ছাত্ৰ-ছাত্ৰীসকলে নিৰ্ধাৰিত চৰকাৰী ৱেবছাইটসমূহৰ জৰিয়তে নিজৰ নম্বৰ তালিকা লাভ কৰিব পাৰিব। ইয়াৰ বাবে পৰীক্ষাৰ্থীসকলে আহছেক ডট অসম ডট গভ ডট ইন, ৰিজাল্ট অসম ডট এন আই চি ডট ইন আৰু ডিজিলকাৰৰ দৰে অনলাইন প্লেটফৰ্মসমূহ ব্যৱহাৰ কৰিব পাৰিব বুলি জানিব পৰা গৈছে।
কলা, বিজ্ঞান আৰু বাণিজ্য শাখাৰ সকলো ছাত্ৰ-ছাত্ৰীয়ে নিজৰ ৰোল নম্বৰ আৰু পঞ্জীয়ন নম্বৰ ব্যৱহাৰ কৰি ইণ্টাৰনেটৰ পৰা ফলাফল সংগ্ৰহ কৰিব পাৰিব। ফলাফল চাবৰ বাবে শিক্ষাৰ্থীসকলে অসম উচ্চতৰ মাধ্যমিক শিক্ষা সংসদৰ অফিচিয়েল ৱেবছাইটলৈ গৈ নিৰ্দিষ্ট লিংকত ক্লিক কৰিব লাগিব আৰু নিজৰ তথ্যসমূহ দি মাৰ্কশ্বিট ডাউনলোড কৰিব পাৰিব। অন্তিম মুহূৰ্তৰ বিসংগতি এৰাবলৈ কৰ্তৃপক্ষই শিক্ষাৰ্থীসকলক নিজৰ প্ৰৱেশ পত্ৰ বা পঞ্জীয়ন কাৰ্ড হাততে সাজু ৰাখিবলৈ পৰামৰ্শ দিছে।
এই বছৰৰ উচ্চতৰ মাধ্যমিক পৰীক্ষা যোৱা ১১ ফেব্ৰুৱাৰীৰ পৰা ১৬ মাৰ্চলৈ ৰাজ্যৰ ৮২১ টা কেন্দ্ৰত অনুষ্ঠিত হৈছিল। তথ্য অনুসৰি এইবাৰ মুঠ ৩,৩০,৭৪৪ গৰাকী ছাত্ৰ-ছাত্ৰীয়ে পৰীক্ষাত অৱতীৰ্ণ হৈছিল।
উল্লেখযোগ্য যে যোৱা বছৰ ৩০ এপ্ৰিলত ফলাফল ঘোষণা কৰা হৈছিল আৰু সেইবাৰ উত্তীৰ্ণৰ হাৰ আছিল ৮১.৭৭ শতাংশ। চলিত বৰ্ষত পৰীক্ষা সমাপ্ত হোৱাৰ মাত্ৰ এমাহৰ ভিতৰতে ফলাফল দিবলৈ ওলোৱা বিষয়টোৱে শিক্ষাৰ্থী আৰু অভিভাৱকৰ মাজত ব্যাপক উৎসাহৰ সৃষ্টি কৰিছে।