এয়াৰ ইণ্ডিয়াৰ মহিলা পাইলটৰ ৰহস্যজনক মৃত্যু, ঘৰৰ পৰা উদ্ধাৰ মৃতদেহ; গ্ৰেপ্তাৰ প্ৰেমিক
এয়াৰ ইণ্ডিয়াৰ এগৰাকী মহিলা পাইলটৰ ৰহস্যজনক মৃত্যুকলৈ চাঞ্চল্যৰ সৃষ্টি হৈছে। মুম্বাইৰ আন্ধেৰীৰ এটা ফ্লেটৰ পৰা উদ্ধাৰ হৈছে এয়াৰ ইণ্ডিয়াৰ পাইলট সৃষ্টি তুলি (২৫)ৰ ওলমি থকা মৃতদেহ। যুৱতীগৰাকীয়ে আত্মহত্যা কৰাৰ সন্দেহ কৰিছে আৰক্ষীয়ে। যুৱতীগৰাকীৰ ডিঙিত মোবাইল ফোন চাৰ্জাৰৰ কৰ্ড বান্ধি থোৱা আছিল। কিন্তু কোনো ছুইচাইড নোট পোৱা নগ’ল।
কিশোৰীগৰাকীৰ মৃত্যুৰ খবৰ পোৱাৰ পিছতে পৰিয়ালটোৱে প্ৰেমিক আদিত্য পণ্ডিত (২৭)ৰ বিৰুদ্ধে এজাহাৰ দাখিল কৰে। তাৰ ওপৰত ভিত্তি কৰি আৰক্ষীয়ে যুৱকজনক গ্ৰেপ্তাৰ কৰে।
বাতৰি অনুসৰি, ঘটনা সংঘটিত হোৱাৰ দিনা ৰাতিপুৱা সৃষ্টিয়ে প্ৰেমিকক ফোন কৰি আত্মহত্যা কৰিব বুলি কয়। সেই সময়ত অভিযুক্তজন দিল্লীলৈ গৈ আছিল। খৰধৰকৈ ফ্লেটটো পালে যদিও ভিতৰৰ পৰা কোনেও দুৱাৰখন খোলা নাছিল। তেনেতে যুৱকজনে নকল চাবি এটা বনাই ফ্লেটটোত সোমাই গ’ল। ভিতৰত ওলমি থকা প্ৰেমিকাক দেখা পায়। চিকিৎসালয়লৈ নিয়াৰ পিছত চিকিৎসকে তেওঁক মৃত বুলি ঘোষণা কৰে।
জানিব পৰা মতে যুৱতীগৰাকী উত্তৰ প্ৰদেশৰ বাসিন্দা। মুম্বাইত কৰ্সূত্ৰে আছিল। দুবছৰ পূৰ্বে যুৱতীগৰাকী কমাৰ্চিয়েল পাইলট পাঠ্যক্ৰমৰ বাবে দিল্লীলৈ গৈছিল। সেই সময়তে আদিত্য পণ্ডিতৰ লগত চিনাকি আৰু প্ৰেমৰ সম্পৰ্ক গঢ়ি উঠে।
মৃতকৰ খুডায়েকে অভিযোগ কৰে যে যুৱকজনে প্ৰায়ে ৰাজপথত সকলোৰে সন্মুখত সৃষ্টিক হাৰাশাস্তি তথা অপমান কৰিছিল। কাপোৰৰ পৰা আৰম্ভ কৰি খাদ্যাভ্যাসলৈকে সকলো সলনি কৰিবলৈ তেওঁক অহৰহ হেঁচা দিয়া হৈছিল। আনকি, যুৱকজনৰ হেঁচাত ছোৱালীজনীয়ে আমিষ খাদ্য খোৱা বন্ধ কৰি দিছিল।
মৃতকৰ পৰিয়ালৰ এজাহাৰৰ ভিত্তিত যুৱকজনৰ বিৰুদ্ধে আত্মহত্যাত প্ৰৰোচনা যোগোৱাৰ গোচৰ ৰুজু কৰি গ্ৰেপ্তাৰ কৰা হয়। আদালতে যুৱকজনক ২৯ নৱেম্বৰলৈকে আৰক্ষীৰ জিম্মালৈ প্ৰেৰণ কৰে।