মহাজোঁটত জঁট! সাম্প্ৰদায়িক মন্তব্যৰ বাবে আজমলক গৰিহণা-সকীয়নি অজিত ভুঞাৰ
বুধবাৰে ধুবুৰীৰ গৌৰীপুৰৰ এক নিৰ্বাচনী প্ৰচাৰ সভাত সাম্প্ৰদায়িক মন্তব্য কৰি এতিয়া মহাজোঁটৰ অন্তৰ্গত আঞ্চলিক গণ মৰ্চাৰ সভাপতি অজিত ভুঞাৰ ৰোষত পৰিছে বদৰুদ্দিন আজমল।
অজিত ভুঞাই আজমলক সাম্প্ৰদায়িক মন্তব্য দিয়াৰ বাবে গৰিহণা দিয়াৰ লগতে মহাজোঁটত থাকি এনেবোৰ মন্তব্য নকৰিবলৈয়ো সকীয়াই দিয়ে।
বৃহস্পতিবাৰে উজানবজাৰস্থিত হোটেল ব্লু-মুনত এক সংবাদমেল সম্বোধন কৰি আজমলৰ সাম্প্ৰদায়িক মন্তব্য সন্দৰ্ভত প্ৰতিক্ৰিয়া বিচৰাত ভুঞাই কয়, ‘আমি যিদৰে হিন্দু সাম্প্ৰদায়িকতাক ঘৃণা কৰো, ঠিক সেইদৰে মুছলমান সাম্প্ৰদায়িকতাকো ঘৃণা কৰো। মই আঞ্চলিক গণ মৰ্চাৰ হৈ এই সংবাদমেলৰ পৰা আজমলক গৰিহণা দিছো। এনেকুৱা সাম্প্ৰদায়িক মন্তব্যই সমাজত ক্ষতি কৰিব।‘
‘এইখন ধৰ্ম নিৰপেক্ষ ৰাষ্ট্ৰ। আমি হিন্দু সন্ত্ৰাসবাদীকো ঘৃণা কৰো, মুছলমান সন্ত্ৰাসবাদীকো ঘৃণা কৰো।‘ ভুঞাই লগতে কয়।
ইপিনে, আমাৰ সাংবাদিকে ‘আজমলৰ এনেবোৰ সাম্প্ৰদায়িক মন্তব্যই মহাজোঁটক ক্ষতি কৰিব নেকি বুলি সোধাত ভুঞাই কয়, ‘নিশ্চয় ক্ষতি কৰিব। মহাজোঁটত ক্ষতি হ’বলৈ দিয়া নহয় কেতিয়াও। মহাজোঁটত এনেধৰণৰ সাম্প্ৰদায়িক ৰাজনীতি কৰিবলৈ দিয়া নহয়।‘
ইপিনে, আজমলতকৈ ১০ গুণ ওপৰত বিজেপিৰ নেতা-পালিনেতাই সাম্প্ৰদায়িক মন্তব্য কৰি আহিছে বুলি ভুঞাই দাবী কৰি লগতে কয়, ‘আজমলৰ মন্তব্যই কংগ্ৰেছৰ মহাঁজোটক ক্ষতি কৰক নকৰক, অসমৰ সমাজ জীৱনক ক্ষতি কৰিব পৰা একো কাম কৰিব নিদিওঁ।‘
আনহাতে, সেই একেখন সংবাদমেলতে বিজেপিৰ ৰাজ্যিক সভাপতি ৰঞ্জিত দাসে কংগ্ৰেছৰ মহাজোঁটক কেন্দ্ৰ কৰি কৰা ইতিকিংসূচক মন্তব্যৰ প্ৰতিক্ৰিয়া প্ৰকাশ কৰি ভুঞাই কয়, ‘সাহস আছে যদি সৰভোগত ৰঞ্জিত দাস এইবাৰ জয়ী হৈ দেখাওক। কংগ্ৰেছৰ মহাজোঁটক লৈ তেওঁলোক শংকিত হৈছে সেইকাৰণে যি টি মন্তব্য কৰি আছে।‘