বিফল স্বাস্থ্য বিভাগ, মন্ত্ৰী হিমন্ত বিশ্ব শৰ্মাই পদত্যাগ কৰিব লাগে : বদৰুদ্দিন আজমল

‘’যোৱা ৯ দিনত ২০ টাকৈ নৱজাতকে মৃত্যুক সাবটি লৈছে যোৰহাট চিকিৎসা মহাবিদ্যালয়ত। স্বাস্থ্য বিভাগৰ ইমানখিনি বিফলতা হ’ল, গতিকে হিমন্ত বিশ্ব শৰ্মাই পদত্যাগ কৰিব লাগে।‘‘ শনিবাৰে দিচপুৰৰ বিধায়ক আৱাসত অনুষ্ঠিত হোৱা এআইয়ুডিএফৰ ক’ৰ কমিটিৰ বৈঠকৰ পাছতেই সংবাদ মাধ্যমৰ আগত এইদৰে পদত্যাগৰ দাবী তোলে দলটোৰ সভাপতি তথা ধুবুৰী লোকসভা সমষ্টিৰ বদৰুদ্দিন আজমলে।

উল্লেখযোগ্য যে, চলিত মাহৰ বিগত ৯ দিনত প্ৰায় দৈনিক নৱজাতকে মৃত্যুক সাবটি লোৱাৰ পাছত সকলো দল-সংগঠনে ইয়াৰ এক উচ্চ পৰ্য্যায়ৰ দাবী তোলাৰ সমান্তৰালকৈ আজমলে স্বাস্থ্য মন্ত্ৰী ড০ হিমন্ত বিশ্ব শৰ্মাৰ পদত্যাগ দাবী কৰা বিষয়টোৱে বিশেষ তাৎপৰ্য্য বহন কৰিছে।

আনহাতে, ইমান এক ডাঙৰ ঘটনা ঘটাৰ পাছত ‘স্বাস্থ্য মন্ত্ৰী ড০ হিমন্ত বিশ্ব শৰ্মাই নৈতিক দায়িত্ব স্বীকাৰ কৰি পদত্যাগ কৰিব লাগে’ বুলিও তেওঁ সংবাদমাধ্যমৰ আগত কয়।

তদুপৰি ৰাজ্যৰ চিকিৎসালয়সমূহত ‘সুস্থ মানুহ গৈ বেছিকৈ অসুস্থ হৈ ঘুৰি আহিবলগীয়া হয়’ এইবুলি দাবী কৰে এআইয়ুডিএফৰ মুৰব্বীগৰাকীয়ে।

তেওঁ লগতে কয়, ‘’আমাৰ ধুবুৰীত যদি ভাল হৈ থকা মানুহ এজন চিকিৎসালয়ত যায় তেন্তে তেওঁ ভাল হৈ ঘুৰি নাহে, বেমাৰী হৈ ঘুৰি আহে।‘’

আনহাতে, পঞ্চায়ত নিৰ্বাচনত কংগ্ৰেছৰ সৈতে মিত্ৰতা হোৱা-নোহোৱা প্ৰসংগত সাংবাদিকে প্ৰশ্ন কৰাত তেওঁ কয়, ‘’যদি কংগ্ৰেছে বিচাৰে তেতিয়া হ’ব পাৰে, এতিয়ালৈকেতো কংগ্ৰেছ আগবাঢ়ি অহা নাই, গতিকে আমিও আগুৱাই যোৱা নাই।‘’

লক্ষণীয় কথা যে, ৰাজ্যত যদিও কংগ্ৰেছে মিত্ৰতা স্থাপন নকৰে তথাপিও দিল্লীত য়ুপিএ চৰকাৰৰ সৈতে মিত্ৰতা বাহাল থাকিব বুলি আজমলে কয়।

আনহাতে, ৰাজ্যৰ আগন্তুক নিৰ্বাচনত যদি কংগ্ৰেছ-এআইয়ুডিএফে মিত্ৰতাত নেখেলে তেন্তে ভোট বিভাজন হ’ব আৰু সেই ভোট বিজেপিলৈ যাব বুলি তেওঁ সংবাদমাধ্যমৰ আগত কয়।

তদুপৰি তেওঁ কয়, ‘’মোদী চৰকাৰ সকলো ক্ষেত্ৰতে ১০০ শতাংশই ফেইলাৰ হৈছে। বিজেপিয়ে হাতত লোৱা এখন আঁচনিও সফলভাৱে ৰূপায়ণ কৰিব পৰা নাই।‘’

তেওঁৰ মতে ‘‘বিজেপিয়ে কেৱল ঠাইৰ নাম বদলোৱা আৰু মন্দিৰ নিৰ্মাণৰ ৰাজনীতি কৰি আছে।‘‘