লিডুত যুৱ ছাত্ৰ পৰিষদৰ দ্বাৰা যোগান মন্ত্ৰী ফণীভূষণ চৌধুৰীৰ পুত্তলিকা দাহ

খাদ্য সামগ্ৰিকে ধৰি নিত্য ব্যৱহাৰ্য সামগ্ৰীৰ মূল্যবৃদ্ধি নিয়ন্ত্ৰণত ব্যৰ্থ তথা ৰাজহুৱা বিতৰণ ব্যৱস্থাত সংঘটিত ব্যাপক দুৰ্নীতি, অনিয়মৰ বিৰুদ্ধে আজি যুৱ ছাত্ৰ পৰিষদে তিনিচুকীয়া জিলাৰ মাৰ্ঘেৰিটা মহকুমাৰ লিডুত উত্তাল প্ৰতিবাদ সাব্যস্ত কৰে।

প্ৰতিবাদকাৰী সকলে ‘বিজেপি চৰকাৰ মুৰ্দাবাদ’, ‘বিজেপি গ’ বেক’, ‘খাদ্য আৰু অসামৰিক যোগান বিভাগৰ মন্ত্ৰী ফণীভূষণ চৌধুৰী মুৰ্দাবাদ’ আদি বিভিন্ন শ্ল’গানেৰে লিডুৰ ৰাজপথ উত্তাল কৰি তোলে।

তদুপৰি জাতীয়তাবাদী যুৱ ছাত্ৰ পৰিষদৰ তিনিচুকীয়া জিলা সমিতিৰ ভাৰপ্ৰাপ্ত সাধাৰণ সম্পাদক কাঞ্চন বৰাৰ নেতৃত্বত পৰিষদৰ মাৰ্ঘেৰিটা আঞ্চলিক সমিতিৰ প্ৰতিবাদকাৰীসকলে লিডুৰ কলেজ তিনিআলিত মন্ত্ৰী ফণীভূষণ চৌধুৰীৰ প্ৰতিকৃতি দাহ কৰে।

প্ৰতিবাদকাৰীসকলে মাৰ্ঘেৰিটা মহকুমাত একাংশ অসাধু ব্যৱসায়ীয়ে নিজ খেয়াল খুচি মতে সামগ্ৰীৰ মূল্যবৃদ্ধি ঘটাই মইমতালি কৰা কাৰ্য্যক তীব্ৰ দি গৰিহণা দি মাৰ্ঘেৰিটা মহকুমাত সংঘটিত হৈ থকা  ৰাজহুৱা বিতৰণ ব্যৱস্থাত চলি থকা দুৰ্নীতি তদন্ত কৰিবলৈ প্ৰশাসনক দাবী জনায়।