অখিল গগৈ গোচৰ: প্ৰথম শুনানিৰ দিনটোত কি ক’লে গুৱাহাটী উচ্চ ন্যায়ালয়ে?

NIA-ৰ আদালতে কৃষক মুক্তি সংগ্ৰাম সমিতিৰ উপদেষ্টা অখিল গগৈৰ জামিন বাতিল কৰাৰ পিছত আজি অৰ্থাৎ সোমবাৰৰ পৰা জামিনৰ শুনানি প্ৰক্ৰিয়া আৰম্ভ হয়।

NIAই অখিলৰ বিৰুদ্ধে অভিযোগ, তথ্য পাতি দাখিলৰ বাবে চাৰি সপ্তাহৰ সময়সীমা বিচাৰিছিল যদিও আদালতে দুসপ্তাহ সময়হে দিছে।

অহা ১৩ অক্টোবৰৰ ভিতৰত অখিলৰ বিৰুদ্ধে বেলেগ অভিযোগ বা তথ্য পাতি থাকিলে দাখিল কৰিবলৈ নিৰ্দেশ দিছে উচ্চ ন্যায়ালয়ে।

আজিৰ পৰা শুনানি আৰম্ভ হয় যদিও অহা ১৩ অক্টোবৰৰ পৰাহে পূৰ্ণ পৰ্য্যায়ৰ শুনানি অনুষ্ঠিত হ’ব।

অখিলৰ হৈ শুনানিত ভিডিও কনফাৰেন্স যোগে অংশগ্ৰহণ কৰে উচ্চতম ন্যায়ালয়ৰ জ্যেষ্ঠ অধিবক্তা পি এছ নৰসিংহই।

এই কথা জনায় অখিল গগৈৰ অধিবক্তা ৰাহুল শেনচোৱাই।

কোভিড-১৯ৰ পৰিপ্ৰেক্ষিতত অসমলৈ নাহি দিল্লীৰ পৰাই ভিডিঅ’ কনফাৰেন্সিঙৰ জৰিয়তে শুনানি প্ৰক্ৰিয়াত অংশগ্ৰহণ কৰিলে নৰসিংহই।

ন্যায়াধীশ কল্যাণ ৰাই চূড়ানা আৰু অজিত বৰঠাকুৰৰ বিচাৰপীঠত চলিছিল এই গোচৰ।

যোৱা ৭ আগষ্টত NIA আদালতে অখিল গগৈৰ জামিন আবেদন নাকচ কৰিছিল। তাৰ পাছতে অখিলৰ অধিবক্তাই ইয়াৰ বিৰুদ্ধে উচ্চ ন্যায়ালয়ত আপীল কৰিছিল।

উল্লেখযোগ্য যে, NIA ৰ ১৩/১৯ নম্বৰ গোচৰত বৰ্তমানো কাৰাৰুদ্ধ হৈ আছে অখিল গগৈ।

যোৱা ৯ মাহে কাৰাৰুদ্ধ অখিল গগৈ বৰ্তমান GMCHত চিকিৎসাধীন হৈ আছে।

ইতিমধ্যে, অখিল গগৈৰ আইনী যুঁজৰ বাবে প্ৰায় ৩০ লাখ টকা সংগ্ৰহ কৰিছে কৃষক মুক্তি সংগ্ৰাম সমিতিয়ে।