উচ্চ ন্যায়ালয়ৰ ৰায়ৰ পাছতে “খঙ”ত ফেচবুক প’ষ্ট অখিল পত্নীৰ; “গোপনীয় ৰাজসাক্ষী”ক সাক্ষাতৰ মন

যোৱা ৭ জানুৱাৰীত গুৱাহাটী উচ্চ ন্যায়ালয়ৰ ন্যায়াধীশ অজিত বৰঠাকুৰ আৰু কে এল চুৰানা বিচাৰপীঠে অখিল গগৈৰ জামিন আবেদন নাকচ কৰাৰ পাছতে নিয়াই ইয়াৰ চাৰ্জশ্বীটত উল্লেখ কৰা গোপন ৰাজসাক্ষীক সাক্ষাত কৰাৰ ইচ্ছা প্ৰকাশ কৰি ফেচবুকযোগে ক্ষোভ উজাৰিছে অখিল গগৈৰ পত্নীয়ে।

অখিলৰ পত্নী গিতাশ্ৰী তামূলীয়ে “খং” ত এক ফেচবুক প’ষ্ট দিয়া পৰিলক্ষিত হৈছে।

প’ষ্টটোত তেওঁ প্ৰথমতে লিখিছে এইদৰে “(খঙত লিখিছো। সান্ত্বনা বা উপদেশ নিদিয়ে যেন।)”

তেওঁ লগতে লিখিছে,”ৰাজসাক্ষীজনক এবাৰ চাবলৈ মন আছে। ইমান কথা জানে!

এবাৰ মুখ দেখুৱাই আহকনা। হাতত অস্ত্ৰ নাই। একো কৰিব নোৱাৰো। কেৱল প্ৰাণভৰি এবাৰ চাম।”

“আপুনি বোলে অস্ত্ৰচালনাৰ প্ৰশিক্ষণ লৈ আহিছিল।” বুলি ৰাজসাক্ষীক উদ্দেশ্য কৰি তামূলীয়ে লগতে কয়, “ইচ্ছা কৰিলে মাৰি থৈ যাব পাৰিব!’’

হে নজনা মুখৰ বীৰ! আমাৰ দৰে মানুহৰ জী্ৱন তেনেই সস্তা।

আপোনাৰ দৰে নিৰাপত্তা ব্যুহুত বিচৰণ কৰি থকা সকল আকৌ সাৰ্বভৌম ক্ষমতাৰ অধিকাৰী, গণতন্ত্ৰৰ ৰক্ষক।”

ইপিনে ইংগিত সূচক ভাৱে অখিলৰ পত্নীয়ে বহুকেইটা প্ৰশ্ন উত্থাপন কৰে। সেইকেইটা তলত অ-সম্পাদিত ৰূপত উল্লেখ কৰা হ’ল

* ” মইহে ভাবিছো, অস্ত্ৰ, বিস্ফোৰণ – এই সকলো আপোনাৰ হাতৰ মুঠিত হৈও আপুনি মাওবাদী নহয় নেকি? আপুনি ৰক্ষণাবেক্ষণ কিয় পালে?’’

* এনেকৈ পৰিচয় লুকুৱাই যিকোনো মানুহে যি ইচ্ছা ক’ব, আৰু আমি তাকে সঁচা বুলি মানি ল’ম?’’

ইপিনে, উক্ত ফেচবুক প’ষ্টত আনন্দৰাম ঢেকিয়াল ফুকনৰ এক বাণী উল্লেখ কৰি তামূলীয়ে কয়, “তাহানিতে কৈছিল, ‘——–কেৱে দুটকা কানিৰ সলনি মিছা সাক্ষী নিদিব, সেই সময়, হে ‘ক্ৰিপামই’ জগদীশ্বৰ শীঘ্ৰে ঘটোৱা!’’

গোপনীয় ৰাজসাক্ষীক কেন্দ্ৰ কৰি অখিল পত্নীৰ পুনৰ প্ৰশ্ন “সেই সময় নাহিল। হয়তো নাহিবও। আপুনি বৰ সুখ আৰু শান্তিত আছে, নহয়নে?

এনেদৰেই, অখিল গগৈ অবিহনে এটা বছৰৰো অধিক সময় কটোৱা পত্নী গিতাশ্ৰী তামূলীয়ে ক্ষোভ প্ৰকাশ কৰাৰ লগতে দুখত ভাঙি পৰে।

উল্লেখযোগ্য যে, অখিল গগৈৰ জামিন বিচাৰি উচ্চ ন্যায়ালয়ৰ ৰায়ৰ বিৰুদ্ধে শীঘ্ৰে উচ্চতম ন্যায়ালয়ৰ দ্বাৰস্থ হ’ব বুলি ইতিমধ্যে ঘোষণা কৰিছে ৰাইজৰ দলৰ নেতৃত্বই।