শিৱসাগৰত আজিৰে পৰা সদৌ অসম ভিত্তিত শিশু নাট সমাৰোহ আৰম্ভ

সাংস্কৃতিক নগৰী শিৱসাগৰত আজিৰে পৰা দুদিনীয়া কাৰ্যসূচীৰে আৰম্ভ হৈছে সদৌ অসম ভিত্তিত শিশু নাট প্ৰতিযোগিতা। শিৱসাগৰ নাট্য বিদ্যালয়ৰ উদ্যোগত আৰু স্বেচ্ছাসেৱা অনুষ্ঠান পথিকৃত, ৰংমন, খোজ, যুগান্তৰ, বিহু সুৰক্ষা সমিতি, অসম আৰু মাহেকীয়া বাৰ্তালোচলী ৰংপুৰ বাৰ্তাৰ সহযোগত শিৱসাগৰৰ নাট্য মন্দিৰত অনুষ্ঠিত এই শিশু নাট সমাৰোহ আজি পুৱা পতকা উত্তোলন কাৰ্যসূচীৰে শুভাৰম্ভ কৰা হয়।

পতকা উত্তোলন কৰে নাট সমাৰোহ উদযাপন সমিতিৰ সভাপতি ডা০ সুকল্যান দাসে। স্মৃতি তৰ্পণ কৰে শিৱসাগৰ নাট্য বিদ্যালয়ৰ কাৰ্যকৰী সভাপতি ডা০ বিমান গগৈ, নাট সমাৰোহ উদযাপন সমিতিৰ কাৰ্যকৰী সভাপতি ক্ৰমে নৰেন চেতিয়া আৰু দিলীপ চাংমায়ে।

অষ্টম বাৰ্ষিক সদৌ অসম শিশু নাট সমাৰোহৰ উদ্ধোধন কৰে শিৱসাগৰ জিলা উপায়ুক্ত ডাঃ এছ লক্ষ্মণনে। ইয়াৰ পিছতে আৰম্ভ হয় সদৌ অসম ভিত্তিত অনুষ্ঠিত শিশু নাট সমাৰোহৰ। অসমৰ সৰ্বমুঠ ৩৩ টা দলে অংশ গ্ৰহণ কৰিবলগীয়া এই নাট সমাৰোহত আজি প্ৰথম দিনাৰ প্ৰতিযোগিতাত ১৬ টা নাট্য দলে অংশ গ্ৰহণ কৰিব।

নাট সমাৰোহৰ সমান্তৰাল কৈ অনুষ্ঠিত হ’ব এক সম্বৰ্ধনা অনুষ্ঠান। বিয়লি ৩ বজাত অনুষ্ঠিত হ’বলগীয়া এই সম্বৰ্ধনা অনুষ্ঠানটো আঁত ধৰিব অনুৰাগ শৰ্মাই। জিলাখনৰ নাট্য আৰু সাংস্কৃতিক জগতত বৰঙণি আগবঢ়োৱা ৯ গৰাকী ব্যক্তি ক্ৰমে প্ৰশান্ত শৰ্মা, অনুজ ৰাজখোৱা, দিলীপ শইকীয়া, প্ৰণতি মহন, ৰঞ্জিমা দত্ত, হৰিহৰ প্ৰসাদ চাহু, জীৱন দে,  ৰুৱী মিলি আৰু বৈকুণ্ঠ দাসক বিশেষ ভাৱে সম্বৰ্দ্ধনা জনোৱা হ’ব।