কোকৰাঝাৰৰ কাৰিগাঁৱত সদৌ চাওঁতাল ছাত্ৰ সন্থাৰ সাংস্কতিক প্ৰতিবাদী সমদল

অসমৰ বিভিন্ন প্ৰান্তৰ লগতে বিটিআৰ অঞ্চলত বসৱাস কৰা চাওঁতাল জনগোষ্ঠীক চাহ-জনগোষ্ঠী হিচাপে সংমিশ্ৰণ কৰিব বিচৰা অসম চৰকাৰৰ হঠকাৰী সিদ্ধান্তৰ বিৰুদ্ধে জাঙুৰ খাই উঠিছে সদৌ চাওঁতাল ছাত্ৰ সন্থাৰ লগতে চাওঁতাল জনগোষ্ঠী৷

জনগোষ্ঠীটোৰ সুকীয়া ভাষা-সাহিত্য, কৃষ্টি-সংস্কৃতি আৰু স্বকীয় পৰিচয় থকা সত্বেও চাহ-জনগোষ্ঠী হিচাপে প্ৰতিষ্ঠা কৰিব বিচৰা কাৰ্যৰ প্ৰতিবাদ জনাই শুকুৰবাৰে কোকৰাঝাৰ জিলাৰ কাৰিগাঁৱত ছাত্ৰ সংগঠনটোৱে চাওঁতাল জনগোষ্ঠীৰ জনসাধাৰণৰ সহযোগত এক বিশাল সাংস্কতিক প্ৰতিবাদী সমদল কাৰ্যসূচী ৰুপায়ণ কৰে৷

সংবাদ মাধ্যমৰ আগত সদৌ চাওঁতাল ছাত্ৰ সন্থাৰ সাধাৰণ সম্পাদক ৰিমান ছ’ৰেণ (এছু) আৰু সাংগঠনিক সম্পাদক দুৰ্গা ছোৰেনে চৰকাৰৰ সিদ্বান্তৰ তীব্ৰ প্ৰতিবাদ জনাই চাওঁতাল সকলে চাহ-জনগোষ্ঠী হিচাপে জাপি দিব বিচৰা কাৰ্যক মানি নলয় বুলি স্পষ্ট কৰি দিয়ে৷

তেওঁলোকে কয় যে ইয়াৰ জৰিয়তে চাওঁতাল সকলক নিঃশেষ কৰিব বিচৰা হৈছে। গতিকে চাওঁতাল সকলক অতি শীঘ্ৰে জনজাতিৰ মৰ্যাদা প্ৰদানৰ লগতে মাটিৰ অধিকাৰ দি চাওঁতাল সকলৰ নিৰাপত্তা চৰকাৰে নিশ্চিত কৰক৷

অন্যথা অহা ৩০ জুনৰ পিছত বৃহৎ প্ৰতিবাদী আন্দোলনৰ কাৰ্যসূচী ৰূপায়ণ কৰা হ’ব বুলিও হুংকাৰ প্ৰদান কৰে ছাত্ৰ নেতাদ্বয়ে৷