সুৰাপায়ীৰ বাবে সুখৱৰ! এমাজন, বিগবাস্কেটত অনলাইন অৰ্ডাৰ কৰি ঘৰতে পাব মদৰ ডেলিভাৰি

কৰ’নাৰ সংকটৰ সময়ত বাহিৰলৈ ওলাই গৈ দীঘলীয়া লাইনত থিয় হৈ মদ কিনি অনাৰ সমস্যা এইবাৰ দূৰ কৰিবলৈ আগবাঢ়ি আহিছে এমাজন, বিগবাস্কেটৰ দৰে অনলাইন বিক্ৰেতা কোম্পানীয়ে।

ই-কমাৰ্ছৰ জায়েন্ট এমাজান আৰু আলিবাবাৰ অধীনৰ বিগবাস্কেটে অনলাইন অৰ্ডাৰৰ জৰিয়তে গ্ৰাহকৰ বছন্দৰ ব্ৰেণ্ড অনুসৰি সুৰাৰ যোগান ধৰিব।

অনলাইন গেলামাল বিক্ৰেতা বিগবাস্কেটে প্ৰথমবাৰৰ বাবে দেশখনত সুৰাৰ বিক্ৰীৰ ক্ষেত্ৰত আগবাঢ়িবলৈ সিদ্ধান্ত গ্ৰহণ কৰিছে।

বাতৰি অনুসৰি, ভাৰতৰ ভিতৰত পশ্চিমবংগত প্ৰথম মদৰ এই হোম ডেলিভাৰি সেৱা আৰম্ভ কৰাৰ কথা চিন্তা কৰিছে এমাজনে।

ৰাজ্যখনত অনলাইন মদ বিক্ৰীৰ ক্ষেত্ৰত এমাজনৰ ৰেজিষ্ট্ৰেশ্যনৰ কোনো সমস্যা নাই বুলি জানিব পৰা গৈছে।

সেয়েহে ৰাজ্যখনৰ সুৰাপায়ীসকলে সোনকালেই তেওঁলোকৰ স্মাৰ্টফোনত ক্লিক কৰিয়েই পছন্দৰ সুৰা ব্ৰেণ্ড ঘৰতে লাভ কৰাৰ অপূৰ্ব সুযোগ লাভ কৰিব।

ভাৰতৰ ভিতৰত পশ্চিমবংগক এই ব্যৱসায়ৰ বাবে প্ৰথমতে বাচি লোৱাৰ কাৰণ হৈছে ইয়াৰ জনসংখ্যা।

জনসংখ্যাৰ ফালৰ পৰা দেশৰ ভিতৰত চতুৰ্থ স্থানত আছে পশ্চিমবংগ। তদুপৰি, ৰাজ্যখনত মদৰ চাহিদাও যথেষ্ট। সেয়েহে, এই ৰাজ্যখনত জনপ্ৰিয় এমাজনে প্ৰথমতে পশ্চিমবংগক বাচি লৈছে।

আনহাতে, আনটো ই-কমাৰ্ছ ছাইট বিগ বাস্কেটেও পশ্চিমবংগতে মদৰ ডেলিভাৰি দিয়াৰ প্ৰস্তুতি চলাইছে।

দেশৰ বিভিন্ন ৰাজ্যত ছুইগি,জ’মেটোৰ দৰে অনলাইনত খাদ্য যোগান ধৰা সংস্থাসমূহেও অৰ্ডাৰ দিলে ঘৰতেই মদ দিয়াৰ ব্যৱস্থা কৰিছে।

কিন্তু লকডাউনৰ প্ৰভাৱত এইবাৰ অনলাইন কাপোৰ তথা আন সামগ্ৰী বিক্ৰী কৰা এমাজনেও অৰ্ডাৰ অনুসৰি মদৰ যোগান ধৰিব।