এইখন হোটেলতে নিশা কটাব আমেৰিকাৰ ৰাষ্ট্ৰপতি ডোনাল্ড ট্ৰাম্পে
বিশ্বৰ সকলোতকৈ শক্তিশালী দেশৰ ৰাষ্ট্ৰপতি ডোনাল্ড ট্ৰাম্প আজি দুদিনীয়া ভ্ৰমণ সূচীৰে ভাৰতত উপস্থিত হৈছে।
ট্ৰাম্পে গুজৰাটৰ আহমেদাবাদত ‘নমস্তে ট্ৰাম্প’ শীৰ্ষক অনুষ্ঠানত অংশগ্ৰহণ কৰি উত্তৰপ্ৰদেশৰ আগ্ৰাত পৃথিৱীৰ সপ্তম আশ্চৰ্য্য তথা প্ৰেমৰ প্ৰতীক তাজমহল দৰ্শন কৰে।
ট্ৰাম্পৰ সৈতে তেওঁৰ পত্নী, জী আৰু জোৱাই উপস্থিত থাকে।
তাজমহল দৰ্শন কৰাৰ পাছতে দিল্লীলৈ উৰা মাৰিব আমেৰিকাৰ ৰাষ্ট্ৰপতিগৰাকী আৰু দিল্লীৰ আইটিচি মোৰ্য্য হোটেলত নিশা কটাব ট্ৰাম্প পৰিয়াল।
উল্লেখযোগ্য যে, ট্ৰাম্পৰ পূৰ্বেও আমেৰিকাৰ পূৰ্বৰ ৰাষ্ট্ৰপতি জৰ্জ ডব্লিউ বুশ্ব, বিল ক্লিণ্টন আৰু বৰাক ওবামাই ভাৰত ভ্ৰমণলৈ অহাৰ সময়তো এইখন হোটেলত বাহৰ পাতিছিল।
বিলাসী হোটেল খনৰ চাৰিমহলাত থকা চাণক্য চুইটত ট্ৰাম্পে নিশা কটাব।
ভাৰতৰ বিলাসী হোটেল সমূহৰ ভিতৰত আইটিচি মোৰ্য্যৰ আভ্যন্তৰীণ বায়ুৰ অৱস্থা আটাইতকৈ উন্নত।
ডোনাল্ড ট্ৰাম্প, পত্নী মেলানিয়া, জীয়ৰী ইভাংকা আৰু জোৱায়ো এইখন হোটেলত থাকি নিশাৰ আহাৰ গ্ৰহণ কৰিব।
খাদ্যৰ ম্যেনুত কি কি থাকিব বৰ্তমানলৈ জানিব পৰা হোৱা নাই যদিও তেওঁলোকে ভাৰতীয় খাদ্যৰ জুতি লোৱাৰ সম্ভাৱনা আছে।
উল্লেখযোগ্য যে, এইখন হোটেলত নিশা কটাবলৈ হ’লে প্ৰতি নিশাত ন্যূনতম ৪-৫ লাখ খৰছ কৰিব লাগিব আৰু বিশ্বৰ বিলাসী হোটেলসমূহত উপলব্ধ সকলো সুবিধা ইয়াত উপলব্ধ।