লকডাউনৰ মাজতে মাংস, কণী বিক্ৰীৰে অভিলেখ অসম পশুধন উন্নয়ন নিগমৰ

লকডাউনৰ মাজতে অসম পশুধন উন্নয়ন নিগমে ছাগলী মাংস,মুৰ্গী আৰু কণী বিক্ৰীৰে অভিলেখ কৰিছে।

লকডাউনৰ সময়চোৱাত নিগমে এইসমূহ সামগ্ৰী বিক্ৰী কৰি ৰাজহ সংগ্ৰহ কৰিলে ৪৫ কোটি টকা।

পাঞ্জাৱাৰীস্থিত পশুধন নিগমৰ কাৰ্যালয়ত সংবাদমেল যোগে মঙলবাৰে এই কথা জনালে পশুধন নিগমৰ অধ্যক্ষ মনোজ শইকীয়াই৷

শইকীয়াই জনাই যে গুৱাহাটীত নিগমে ছাগলী মাংস বিক্ৰী কৰিছে ২৭ টন। ইয়াৰ মূল্য ১.৭৫ কোটি টকা।

তাৰোপৰি নিগমে ব্রয়লাৰ মাংস ১৮ টন আৰু ২০৮০০ প্লেট কণী বিক্ৰী কৰিছে।

ইফালে ৰাজ্যত নিগমৰ জৰিয়তে প্ৰায় ৩৫ কোটি টকাৰ ব্রয়লাৰ মাংস বিক্ৰী হৈছে৷

“ছাগলী মাংস বিক্ৰী হৈছে ২.৩ কোটি টকা৷ কণী বিক্ৰী হৈছে ৭৬১৯০ কাৰ্টন। ৬.৯৩ কোটি টকাৰ কণী বিক্ৰী হৈছে,” জনায় শইকীয়াই৷

লকডাউনৰ ফলত বহু নিবনুৱা যুৱকৰ বাবে আন এক পথ মুকলি হ’ল বুলি জনাই শইকীয়াই কয় “বহু উচ্চ শিক্ষিত যুৱকক ছাগলী/ব্রয়লাৰ মাংস বিক্ৰী কৰিবলৈ অনুমতি দিছে নিগমে।”

তেওঁ লগতে জনাই যে খুব কম দিনৰ ভিতৰতে অসমত অতিৰিক্ত ৯টা কচাইখানা মুকলি হ’ব।

শইকীয়াই কয়, “অনলাইন এপৰ জৰিয়তে নিগমে ছাগলী মাংস, কণী, হাঁহৰ মাংস, মুৰ্গীৰ মাংস দিয়াৰ ব্যৱস্থা কৰিছে নিগমে৷ গুৱাহাটীৰ কোনো লোকে নিগমৰ জৰিয়তে ব্যৱসায় কৰিবলৈ ইচ্ছা কৰিলে সুবিধা দিব নিগমে।”

তেওঁ লগতে জনাই যে গুৱাহাটীৰ বিৰুবাৰী, উত্তৰ গুৱাহাটী আৰু কমলপুৰত নিগমে নতুনকৈ আউটলেট স্থাপন কৰিব৷