ফেচবুক কৰ্ণাৰ : আলফাত যোগদান কৰা সাংবাদিক বিদ্যুৎ মহন্তৰ পত্নীৰ এটা ফেচবুক পোষ্ট

মই বিদ্যুৎ মহন্তৰ পত্নী। হয়, সেইজন বিদ্যুৎ মহন্ত যিজনে আকস্মিকভাৱে এটা দীঘলীয়া ফেচবুক প’ষ্ট আৰু পত্নীলৈ এটা হুৱাটচ আপ মেছেজ কৰি আলফা স্বাধীনলৈ গমন কৰিলে(!)

তেওঁ গ’লগৈ ,দিন হিচাপত আজি ১৬ দিন। এই ১৬দিনত আমি কিদৰে আছোঁ কেৱল আমিহে অনুভৱ কৰিছো। কাৰণ আজি পৰ্যন্ত আমি তেওঁৰ এই সিদ্ধান্তৰ কোনো যথাযথ খবৰ পোৱা নাই। কাক সুধিম, কোনে দিব তেওঁৰ খবৰ। বাতৰিৰ পিছত দৌৰি থকা মোৰ প্ৰিয়তম পুৰুষজন নিজেই এটা বাতৰি হৈ মোক চিৰদিনলৈ এৰি বাকৰূদ্ধ কৰি অজ্ঞাত স্থানলৈ গুচি গৈছে কোনো ঠিকনা নজনোৱাকৈ। মই এগৰাকী সাধাৰণ মহিলা, এই দুৰ্ঘটনাৰ পিছত মনত বহুত কথাই অগাদেৱা কৰিছে। এই প’ষ্টটো লিখি মই কাৰো পুতৌৰ পাত্ৰ হ’ব নাই বিচৰা। কেইটামান কথা সুধিছোঁ, আলফা (স্বাধীন)ৰ সেনাধ্যক্ষ পৰেশ বৰুৱা মহাশয়ক, যদি কেনেবাকৈ কোনোবাদিনা এই প’ষ্টটো আপোনাৰ দৃষ্টিগোচৰ হয় দয়াকৰি মোক মোৰ উত্তৰ কেইটা দিব –

১) মোৰ স্বামী শ্ৰী বিদ্যুৎ মহন্ত সচাকৈয়ে আপোনাৰ সংগঠনলৈ গৈছে নেকি?
২) তেওঁ যদিহে গৈছে তেওঁক সোধক তেওঁ লিখাৰ দৰে মোক কি দি থৈ গৈছে যে এটা কণমানি ল’ৰা, বয়সে গৰকা তেওঁৰ নিজ পিতৃ-মাতৃক মই কিদৰে দুখত নপৰাকৈ ৰাখিম ?
৩) তেওঁক জৱাব দিবলৈ কওঁক, এজন স্বামী হিচাপে হোমৰ জুইক সাক্ষী কৰি নিৰাপত্তা দিম বুলি অনা মইজনীক তেওঁ মাজ পথত কাৰ ভৰষাত এৰি এই পথত ভৰি থলে।
৪) তেওঁক কওঁক যদি তেওঁৰ সৎসাহস আছে, এবাৰ মোক নিজ মুখে ক’বলৈ, যে মোৰ কি ভুলৰ পৰিণাম দিলে এইয়া।
৫) তেওঁ কিহৰ স্বাধীনতা বিচাৰি গ’ল, সেই স্বাধীনতা কেনে স্বাধীনতা য’ত বঙহেই বঙহৰ তেজ চুহে।
৬) আপুনি প্ৰতিশ্ৰুতি দিব পাৰিবনে যে আপোনালোকৰ প্ৰাপ্য স্বাধীনতা পালেই অসমৰ থলগিৰী ৰাইজে ন্যায় পাব, শান্তি পাব।
নোৱাৰে ডাঙৰীয়া নোৱাৰে। যেতিয়ালৈকে মানুহ প্ৰকৃততে মানুহ নহয়, যেতিয়ালৈকে শিক্ষাই মানুহক অন্তৰেৰে চুই নাযায়, যেতিয়ালৈকে মানুহে নিজৰ লোলুপ অভিপ্ৰায় মনত ৰাখিব তেতিয়ালৈকে কোনো স্বাধীনতাই মানুহক স্বাধীন কৰিব নোৱাৰে, হাজাৰ বিদ্যুৎ মহন্ত যাওঁক , এই স্বাধীনতা মৰীচিকাৰ বাহিৰে একো নহয়।

মই তেওঁক ঘূৰাই বিচৰা নাই, ৰাখি থওঁক তেওঁক তাতে , কেৱল মোক উত্তৰ লাগে যে তেওঁ সঁচাকৈয়ে গৈছে। তেওঁ যদি নিজ ইচ্ছাত গৈছোঁ বুলি মোক এবাৰ কয়, মই এই মুহূৰ্ততে তেওঁৰ নাম মোৰ জীৱনৰপৰা বিসৰ্জন দিম। তেওঁ যাওঁক, কৰক অসমক স্বাধীন । আমি সকলো ইয়াৰ সাক্ষী হ’ম। কিন্তু এটা কথা মই বাৰে বাৰে কম, তেওঁৰ এই যাত্ৰাৰ নিশ্চয়তা দিয়ক। যদি তেওঁ আপোনাৰ সংগঠনলৈ যোৱা নাই সেইয়াও কওঁক। মাথো ঘৰখনক আগুৱাই যাবলৈ আপোনাৰ মতামত জনাওক। 🙏

       ধন্যবাদ🙏