পোহৰলৈ আহিল হৰপ্পা সভ্যতাৰ ন ন তথ্য : খনন কাৰ্যত উদ্ধাৰ প্ৰাচীন কংকাল আৰু মাটিৰ পাত্ৰ
ভাৰতীয় পুৰাতত্ত্ব বিভাগে পুনৰ এক ডাঙৰ সাফল্য অৰ্জন কৰিবলৈ সক্ষম হৈছে। সিন্ধু উপত্যকা সভ্যতাৰ আটাইতকৈ ডাঙৰ স্থান হিচাপে পৰিচিত ৰাখিগড়ীত খনন কাৰ্য চলাই আঠটাকৈ মানুহৰ কংকাল আৰু মাটিৰ পাত্ৰ উদ্ধাৰ কৰা হৈছে।
জানিব পৰা মতে, এই কংকালকেইটা ৭ নম্বৰ টিলাত পোৱা গৈছে, য’ত হৰপ্পা সভ্যতাৰ মানুহে তেওঁলোকৰ মৃতদেহ কবৰ দিছিল।
এই সন্দৰ্ভত পুৰাতত্ত্ব বিভাগৰ বিষয়া মনোজ ছাক্সেনাই জানিবলৈ দিয়ে যে এতিয়ালৈকে পাঁচটা কংকাল বাহিৰলৈ উলিওৱা হৈছে। ইয়াৰে তিনিটা পৰীক্ষাৰ বাবে কলকাতালৈ পঠিওৱা হৈছে। এটা কংকালৰ নমুনা লক্ষ্ণৌলৈ পঠিওৱা হৈছে, যাৰ ডিএনএ পৰীক্ষা কৰা হ’ব। তেওঁ কয় যে দুই বা তিনি মাহৰ ভিতৰত ইয়াৰ প্ৰতিবেদন পোৱা যাব পাৰে।
এক প্ৰতিবেদন অনুসৰি, দুটা কংকাল চল্লিছৰ ঊৰ্ধ্বৰ দুগৰাকী মহিলাৰ আৰু এটা পুৰুষৰ আছিল। এগৰাকী বিষয়াই জানিবলৈ দিয়া মতে, প্ৰতিটো মৃতদেহৰ ওচৰত মাটিৰ পাত্ৰ পোৱা গৈছে, যিবোৰ সম্ভৱত সমাধিস্থ কৰাৰ সময়ত ৰখা হৈছিল। উল্লেখ্য যে ইয়াৰ পূৰ্বে এটা কংকালৰ ওচৰত ২৭ টা মাটিৰ পাত্ৰ পোৱা গৈছিল। তেওঁ লগতে কয় যে মহিলাগৰাকীৰ কংকালটোৰ হাতত খাৰুও আছিল, যিবোৰত সোণৰ মণি লগোৱা আছিল।
বিষয়াজনে জনায় যে আন তিনিটা কংকাল পোৱা গৈছে যদিও সেইবোৰ অক্ষত অৱস্থাত নাই। সম্ভৱতঃ খেতি-বাতিৰ বাবে এই কংকালবোৰৰ কিছু ক্ষতি হৈছে। ৰাখিগড়ীক সংৰক্ষিত এলেকা হিচাপে ঘোষণা কৰাৰ আগতে ইয়াত ব্যাপকভাৱে খেতি কৰা হৈছিল। যোৱা কেইবছৰমানৰ ভিতৰত পুৰাতত্ত্ব বিভাগ আৰু পুনেৰ ডেকান কলেজে যুটীয়াভাৱে কমেও ৭০ টা কংকাল খনন কৰি উলিয়াইছে। যোৱা ২২ ফেব্ৰুৱাৰীৰ পৰা পুৰাতত্ত্ব বিভাগে ৫৫০ হেক্টৰ এলেকা জুৰি এই খনন কাৰ্য আৰম্ভ কৰিছিল।
বিশেষজ্ঞসকলৰ অনুমান যে চাৰিৰ পৰা পাঁচ হাজাৰ বছৰ আগতে মানুহে মৃতদেহৰ লগত দৈনন্দিন ব্যৱহাৰ্য বস্তুও কবৰ দিছিল। সেইবাবেই প্ৰায়েই মৃতদেহৰ কাষত মাটিৰ পাত্ৰ ৰখা হৈছিল। ৫ নম্বৰ টিলাৰ খনন কাৰ্যৰ সময়ত পুৰাতত্ত্ব বিভাগে মাটিৰ পাত্ৰ আৰু দৈনন্দিন ব্যৱহাৰ্য আন বস্তুৰ লগতে এটা ঘৰৰ গাঁথনিও আৱিষ্কাৰ কৰিছে। কোৱা হয় যে চাৰি-পাঁচ হাজাৰ বছৰৰ আগতে সিন্ধু উপত্যকা সভ্যতা এটা বিশাল অঞ্চলৰ সামাজিক আৰু অৰ্থনৈতিক কেন্দ্ৰ আছিল। পুৰাতত্ত্ব বিভাগৰ বিষয়াসকলে কয় যে ৰাখিগড়ীত এতিয়াও বহুতো ৰহস্য লুকাই আছে। ইয়াত পোৱা সামগ্ৰীবোৰে আমাক হৰপ্পা সভ্যতা আৰু সেই সময়ৰ নগৰীয়া জীৱনৰ বিষয়ে বুজাত বহু সহায় কৰিব পাৰে।