ভেটী লৈ থাকোতেই দুৰ্নীতি নিবাৰক শাখাৰ জালত পৰিল ধমধমা আৰক্ষী চকীৰ বিষয়া

ৰাজ্য চৰকাৰে দুৰ্নীতিৰ বিৰুদ্ধে শূন্য সহনশীল নীতি গ্ৰহণ কৰাৰ সময়তে ১১ ডিচেম্বৰ অৰ্থাৎ মঙলবাৰে সন্ধিয়া গুৱাহাটীৰ দুৰ্নীতি নিবাৰক শাখাৰ এটা দলে নলবাৰীৰ ধমধমা আৰক্ষী চকীৰ দুৰ্নীতিপৰায়ণ ভাৰপ্ৰাপ্ত বিষয়া পবেন্দ্ৰ কুমাৰ দাসক ঘোচ লৈ থকাৰ সময়তে হাতে-লোটে গ্ৰেপ্তাৰ কৰে।

জানিব পৰা মতে, ঘোচখোৰ আৰক্ষী বিষয়াজনে থানাত ৰুজু হৈ থকা এটা গোচৰ সংক্ৰান্তত স্থানীয় হুছেইন আলী নামৰ এজন ব্যক্তিৰ পৰা নগদ দহ হাজাৰ টকা উৎকোচ হিচাপে বিচাৰিছিল। যোৱা ১০ ডিচেম্বৰ অৰ্থাৎ সোমবাৰে হুছেইনে উক্ত ধনৰ আগধন হিচাপে চাৰি হাজাৰ টকা বিষয়াগৰাকীক প্ৰদান কৰে। আৰু ইয়াৰ পাছতে সমগ্ৰ ঘটনা সন্দৰ্ভত দুৰ্নীতি নিবাৰক শাখাক অৱগত কৰে।

এই অভিযোগৰ ভিত্তিত দুৰ্নীতি শাখাই মঙলবাৰে সকলো পৰিকল্পনা ৰচনা কৰি হুছেইনক বাকী ছহাজাৰ টকা বিষয়াগৰাকীক দিবলৈ থানালৈ পঠিয়ায়। আৰক্ষী বিষয়াগৰাকীয়ে ধনখিনি লোৱাৰ পাছতে থানাৰ ওচৰতে বাহৰ পাতি থকা দুৰ্নীতি নিবাৰক শাখাৰ দলটোৱে বিষয়া পবেন্দ্ৰ কুমাৰ দাসক হাতে-লোটে ধৰে।

উল্লেখযোগ্য যে অভিযোগকাৰী হুছেইনে আৰক্ষী বিষয়াজনক দিবলৈ যোৱা ধনখিনিত দুৰ্নীতি নিবাৰক শাখাৰ দলটোৱে আগতীয়াকৈ স্বাক্ষৰ কৰি থৈছিল। আৰু সেই প্ৰমাণৰ আধাৰতে বিষয়াজনক গ্ৰেপ্তাৰ কৰে।

ইফালে ঘোচখোৰ আৰক্ষী বিষয়া পবেন্দ্ৰ কুমাৰ দাসক সম্প্ৰতি দুৰ্নীতি নিবাৰক শাখাৰ দলটোৱে জেৰা চলাই থকা বুলি জানিব পৰা গৈছে।