এছিয়ান গেইমছ ভিলেইজত হিমাৰ পৰা নমুনা সংগ্ৰহ কৰিলে এণ্টি ড’পিং দলে : ৰিজাল্টৰ অপেক্ষাত

ইণ্ডোনেছিয়াত চলি থকা এছিয়া গেইমছৰ ট্ৰেকত গোটেই ভাৰতৰ আশা আৰু ভৰসা হিমা দাসক লৈ অসমৰ সকলো ৰাইজ উৎকণ্ঠিত হৈ থকাৰ মাজতে ড’প টেষ্টৰ সন্মুখীন হ’ব লগীয়া হৈছে তাৰকাগৰাকী। অলিম্পিক কাউন্সিল অব এছিয়া (OCA)ৰ ড’পিং বিৰোধী এটা দলে এই নমুনা সংগ্ৰহ কৰিছে। অৱশ্যে এয়া কোনো সন্দেহৰ বাবে হয় নে নহয় সেয়া জানিব পৰা হোৱা নাই।

এটা সূত্ৰৰ পৰা পোৱা খবৰ মতে ড’প বিৰোধী দলটোৱে কেইজনমান ভাৰতীয় দৌৰবিদৰ নমুনা সংগ্ৰহ কৰিব বিচাৰিছিল। উক্ত সময়ত বেছিভাগ ভাৰতীয় দৌৰবিদ ক্ৰীড়া গাৱঁৰ পৰা দূৰত অনুশীলনৰ বাবে গৈছিল।

ফলত সেই সময়ত উপস্থিত থকা অসমৰ হিমা দাস (২০০ আৰু ৪০০ মিটাৰ) আৰু হাৰিয়ানাৰ নিৰ্মলা শেওৰন (৪০০ মিটাৰ)ৰ নমুনা সংগ্ৰহ কৰে ড’পিং বিৰোধী দলটোৱে।

উল্লেখযোগ্য যে যোৱা  এপ্ৰিল মাহত অষ্ট্ৰেলিয়াত হৈ যোৱা কমনৱেলথ গেইমছতো ভাৰতীয় বক্সিং খেলুৱৈ থকা শিবিৰত চিৰিঞ্জ উদ্ধাৰ হোৱা ঘটনা ঘটিছিল। আন আন সময়তো ভাৰতীয় খেলুৱৈ ডপিঙৰ অভিযোগত অভিযুক্ত হোৱাৰ উদাহৰণ আছে বাবেই অলিম্পিক কমিটিৰ ড’পিং বিৰোধী দৃষ্টিৰ লক্ষ্য হৈ আহিছে ভাৰত।

অৱশ্যে নমুনা সংগ্ৰহ কৰিলেও তাৰ ফলাফল সন্দৰ্ভত এতিয়াও একো জানিব পৰা হোৱা নাই।

তাৰোপৰি খেলুৱৈগৰাকীয়ে চাপমুক্ত হৈয়ে কাইলৈ প্ৰতিযোগিতাত নামিব বুলি দেশৰ কোটি কোটি অনুৰাগীয়ে আশা কৰি আছে।