কৃষকৰ পৰা উৎকোচলৈ দৰঙত গ্ৰেপ্তাৰ মহিলা কৃষি বিষয়া জ্যোতিৰেখা দাস
উৎকোচলৈ ধৰা পৰিল এগৰাকী মহিলা কৃষি বিষয়া।দৰং জিলাৰ কৃষি উন্নয়ন বিষয়া জ্যোতি ৰেখা দাসক আজি দুৰ্নীতি নিবাৰক শাখাই উৎকোচলৈ থকাৰ সময়তে হাতে-লোটে ধৰা পেলায়।
মহিলা কৃষি বিষয়া গৰাকীয়ে এগৰাকী ঘেঁহু খেতিয়কৰ পৰা উৎকোচ গ্ৰহণ কৰি আছিল।
দলগাঁৱৰ খাৰুপেটীয়াত কৰ্মৰত মহিলা কৃষি বিষয়াগৰাকীৰ বিৰুদ্ধে ইয়াৰ পূৰ্বেও উৎকোচ গ্ৰহণৰ ভালেমান অভিযোগ উত্থাপন হৈছিল।
শেহতীয়াকৈ তেওঁ জয়নাল আবেদিন নামৰ ঘেঁহু খেতিয়ক গৰাকীৰ পৰা ১৫,০০০ টকা দাবী কৰিছিল।ইয়াৰ বিনিময়ত জ্যোতি ৰেখা দাসে আবেদিনে উৎপাদন কৰা ঘেঁহু এনএএফইডিকে ধৰি অন্যান্য সংস্থাক বিক্ৰী কৰি থকা বুলি ভুৱা প্ৰমাণপত্ৰ দিব বুলি প্ৰতিশ্ৰুতি দিছিল।
কিন্তু এই বিষয়ে দুৰ্নীতি নিবাৰক শাখাই আগতীয়াকৈ খবৰ পোৱাৰ পিছতে মহিলা কৃষি বিষয়াগৰাকীক জালত পেলোৱাৰ কৌশল ৰচনা কৰে।
সেই মৰ্মে আজি দুৰ্নীতি নিবাৰক শাখাই জ্যোতিৰেখা দাসক তেওঁৰ মঙলদৈৰ শান্তিপুৰত থকা ভাড়াঘৰৰ পৰাই গ্ৰেপ্তাৰ কৰে।ইপিনে জিলা কৃষি বিষয়া জ্যোতিষ নাথে নৰ্থ ইষ্ট নাওক জনোৱা মতে কোনো কৃষি উন্নয়ন বিষয়াই তেনে প্ৰমাণপত্ৰ দিব নোৱাৰে।
জ্যোতিৰেখা দাসে নীতিৰ বাহিৰলৈ গৈ তেনে কৰিব বিচাৰিছিল।উল্লেখ্য অসম লোক সেৱা আয়োগৰ কেলেংকাৰীৰ সৈতেও ধৃত জ্যোতিৰেখা দাসৰ নাম সাঙোৰ খাই আছে।
তেওঁৰ বিৰুদ্ধে গুৱাহাটীৰ ভঙাগড়ৰ থানাত 159/ 2017 নম্বৰত গোচৰ ৰুজু হৈ আছে।