গ্ৰেপ্তাৰ হ’বলৈ গৈ আছে শ্বাহবাজ শ্বৰীফ? পাকিস্তানৰ প্ৰধানমন্ত্ৰীৰ বিৰুদ্ধে গ্ৰেপ্তাৰী পৰোৱানা জাৰি!

নিজৰ দেশতে বিপদত পৰিছে পাকিস্তানৰ প্ৰধানমন্ত্ৰী শ্বাহবাজ শ্বৰীফ! তেওঁৰ বিৰুদ্ধে গ্ৰেপ্তাৰী পৰোৱানা জাৰি কৰা হৈছে। পাকিস্তান অধিকৃত বেলুচিস্তানৰ নিৰ্বাসিত চৰকাৰে যোৱা বৃহস্পতিবাৰে এই ৱাৰেণ্ট জাৰি কৰিছিল। ছ’চিয়েল মিডিয়াত এই গ্ৰেপ্তাৰী পৰোৱানা ৰাজহুৱা কৰে বেলুচ নেতা মিৰ য়াৰ বালোচে।

বুধবাৰে মিৰে ছ’চিয়েল মিডিয়াত কয় যে বৃহস্পতিবাৰে পাকিস্তানৰ প্ৰধানমন্ত্ৰী শ্বাহবাজ শ্বৰীফৰ বিৰুদ্ধে ৰিপাব্লিক অৱ বেলুচিস্তানে গ্ৰেপ্তাৰী পৰোৱানা জাৰি কৰিছে। স্বতন্ত্ৰ বেলুচিস্তানৰ ভিছাৰ নিয়ম উলংঘা কৰাৰ অভিযোগ উঠিছে শ্বাহবাজৰ বিৰুদ্ধে।

৮ জানুৱাৰীৰ নিৰ্দেশনা অনুসৰি বেলুচিস্তানৰ সাৰ্বভৌমত্ব গুৰুতৰ আৰু ইচ্ছাকৃতভাৱে উলংঘা কৰাৰ অপৰাধত পাকিস্তানৰ প্ৰধানমন্ত্ৰী শ্বাহবাজ শ্বৰীফক গ্ৰেপ্তাৰ কৰা হ’ব পাৰে। বৈধ ভিছা অবিহনে বেলুচিস্তানত অবৈধভাৱে প্ৰৱেশ কৰাৰ অভিযোগ অনা হৈছে। বেলুচিস্তান গণৰাজ্যৰ আইন আৰু সাৰ্বভৌম কৰ্তৃপক্ষ অনুসৰি যিকোনো বিমানবন্দৰতে আগমন বা প্ৰস্থানৰ সময়ত এনে গ্ৰেপ্তাৰ হ’ব পাৰে।

বেলুচ জনসাধাৰণে স্পষ্টকৈ উল্লেখ কৰিছে যে বেলুচিস্তান এখন স্বাধীন, সাৰ্বভৌম আৰু স্বাধীন ৰাষ্ট্ৰ। ফলত ইয়াত কোনোৱেই অনুপ্ৰৱেশ আইনতকৈ ওপৰত নহয়। আনকি পাকিস্তানৰ প্ৰধানমন্ত্ৰীও নহয়। পৰ্যাপ্ত আইনী নথি-পত্ৰ আৰু অনুমোদিত ভিছা অবিহনে বেলুচিস্তানত প্ৰৱেশ কৰাটো বেলুচিস্তানৰ আইন অনুসৰি ফৌজদাৰী অপৰাধ। অনুমতি অবিহনে বেলুচিস্তানৰ আকাশমাৰ্গ বা সাগৰীয় বন্দৰত কোনো লোকক প্ৰৱেশ কৰিবলৈ দিয়া নহ’ব।

উল্লেখ্য যে বিগত কেইটামান দশক ধৰি বেলুচ বিদ্ৰোহীয়ে পাকিস্তানৰ পৰা বিচ্ছিন্নতা বিচাৰি অহৰহ আন্দোলন কৰি আহিছে। যোৱা বছৰৰ পৰা সেই দাবীত আৰু অধিক বৃদ্ধি পাইছে সশস্ত্ৰ আন্দোলন। পাকিস্তানী সেনাইও প্ৰতিশোধ লৈছে। যোৱা বছৰৰ জানুৱাৰী মাহৰ পৰা বেলুচিস্তানত প্ৰায় ৪৫০ জন লোকে প্ৰাণ হেৰুৱাইছে, ইয়াৰে অধিকাংশই নিৰাপত্তাৰক্ষী।

আনহাতে, ৰে’ল অপহৰণৰ সমান্তৰালকৈ আত্মঘাতী আক্ৰমণো অব্যাহত আছে। ইয়াৰ বিনিময়ত পাকিস্তানী সেনাই বেলুচিস্তানৰ সাধাৰণ নাগৰিকক বাছি বাছি অপহৰণ কৰাৰ অভিযোগ উত্থাপন হৈছে। মুঠৰ ওপৰত স্বাধীনতা আন্দোলন তীব্ৰতৰ হৈ পৰিছে। সেই পথ অনুসৰণ কৰি বেলুচিস্তানে এতিয়া পাকিস্তানৰ প্ৰধানমন্ত্ৰীৰ বিৰুদ্ধে গ্ৰেপ্তাৰী পৰোৱানা জাৰি কৰিছে।