জাতিৰ পিতা মহাত্মা গান্ধীৰ ১৫০ সংখ্যক জন্মজয়ন্তী পালন অৰুণাচল কংগ্ৰেছৰ
আজি জাতিৰ পিতা মহাত্মা গান্ধীৰ ১৫০ সংখ্যক জন্মজয়ন্তী। গান্ধী জয়ন্তী উপলক্ষে দেশৰ বিভিন্ন প্ৰান্তৰ লগতে আজি পুৱা অৰুণাচল প্ৰদেশ কংগ্ৰেছ কমিটিয়েও ইটানগৰস্থিত ৰাজভৱনত জাতিৰ পিতা মহাত্মা গান্ধীক শ্ৰদ্ধাঞ্জলি জ্ঞাপন কৰাৰ উদ্দেশ্যেৰে এক শ্ৰদ্ধাঞ্জলি অনুষ্ঠানৰ আয়োজন কৰে।
অৰুণাচল প্ৰদেশ কংগ্ৰেছৰ সভাপতি টাকাম সঞ্জয়, সম্পাদক জেনিথ চাংমা, বিধায়ক মাৰ্কিও টাডোৰ লগতে ৰাজ্যৰ শীৰ্ষ পৰ্যায়ৰ কংগ্ৰেছ নেতা-কৰ্মীসকল শ্ৰদ্ধাঞ্জলি অনুষ্ঠানত উপস্থিত থাকে।
গান্ধী জয়ন্তী উপলক্ষে আয়োজন কৰা শ্ৰদ্ধাঞ্জলী অনুষ্ঠানত উপস্থিত থাকি অৰুণাচল প্ৰদেশ কংগ্ৰেছৰ সম্পাদক জেনিথ চাংমাই নিজৰ ভাষণ প্ৰসংগত উল্লেখ কৰে যে দেশে স্বাধীনতা লাভ কৰাৰ ক্ষেত্ৰত তথা সমাজত শান্তি আৰু সম্প্ৰীতি বজাই ৰখাৰ স্বাৰ্থত এইগৰাকী মহান ব্যক্তিৰ অবদান অতুলণীয়।
তেওঁ লগতে কয় যে গান্ধীজীৰ আদৰ্শই শান্তি-সম্প্ৰীতি তথা ভাতৃত্ববোধ বৰ্তাই ৰাখিবলৈ আমাক অনুপ্ৰাণিত কৰে। আৰু এই কাৰকবোৰেই হৈছে এখন দেশৰ উন্নয়নৰ প্ৰধান আহিলা। তেওঁ লগতে দলৰ কৰ্মচাৰীসকলক গান্ধীৰ আদৰ্শক অনুকৰণ কৰিবলৈ আহ্বান জনায়।
এই অনুষ্ঠানৰ পাছতে অৰুণাচল প্ৰদেশ কংগ্ৰেছৰ সভাপতি টাকাম সঞ্জয় আৰু সম্পাদক জেনিথ চাংমাই ইটানগৰস্থিত ৰাজীৱ ভৱনৰ পৰা এটা ৰেলীৰ শুভাৰম্ভণি কৰে। এই ৰেলীটোত অংশ লোৱা লোকসকলে কাইলৈ পালিনত অনুষ্ঠিত হ’বলগীয়া ‘মাছ নেশ্যনেল কংগ্ৰেছ ৰেলী’ত অংশ ল’ব।