সাহিত্যিক পেঞ্চন অবিহনে পৃথিৱীৰ মায়া ত্যাগ কৰিলে গণকবি অশোক দাসে

আজি ৰাভা দিৱসৰ বিশেষ দিনত গোলাঘাটৰ গণকবিখ্যাত,নাট্যকাৰ, ঔপন্যাসিক, গল্পকাৰ অশোক দাসে শেষ নিশ্বাস ত্যাগ কৰে।

সুদীৰ্ঘ দিন ধৰি শাৰীৰিক অসুস্থতাৰ অন্তত আজি পুৱা ৭-২০ বজাত ঘিলাধাৰী চকৰধৰাৰ নিজ বাসগৃহত এই সৰলমনা সাহিত্যিক জনে ৭৪ বছৰ বয়সত অজস্ৰ গুণমুগ্ধক এৰি অনন্তধামলৈ গতি কৰিলে।

আজি অসমীয়া সাহিত্য সন্মিলনীৰ গোলাঘাট জিলাৰ প্ৰাক্তন সভাপতিগৰাকীৰ মৃত্যুত শোকস্তব্ধ গোলাঘাটবাসী।

১৯৪৭ চনত জন্মগ্ৰহণ কৰা দাসে ওৰেটো জীৱন সাহিত্য চৰ্চা কৰি দহখনতকৈও অধিক কাব্যগ্ৰন্থ ,উপন্যাস, গল্পপুথি, শিশু পুথি ৰচনা কৰি সাহিত্য ক্ষেত্ৰখনলৈ অনবদ্য বৰঙণি আগবঢ়াই গৈছে। তেওঁৰ এই প্ৰস্থান অসমীয়া সাহিত্য জগতৰ এক অপূৰণীয় ক্ষতি।

উল্লেখ্য যে, এই সৰল, প্ৰচাৰ বিমূখ সাহিত্যিকগৰাকীয়ে বহুবাৰ আবেদন নিবেদন কৰাৰ পাছতো আজিকোপতি লাভ নকৰিলে সাহিত্যিক পেঞ্চন।

আনহে নালাগে সময়ে সময়ে তেখেতৰ সাহিত্য চৰ্চাৰ ওপৰত বহু বাতৰি কাকত, আলোচনীত খবৰ প্ৰকাশ হোৱাৰ পিছতো ৰজাঘৰীয়াৰ চকুত নপৰিল তেওঁৰ সৃষ্টিশীল কৰ্মৰাজিৰ ওপৰত। আৰু এনেকৈয়ে আজি এক আক্ষেপ লৈ যেন এই  সদা মৌন সাহিত্যিকগৰাকী পৃথিৱীৰ মায়া এৰিলে।

অৱশ্যে, ৰাইজৰ স্বীকৃতিৰে উৰ্বৰ এই কবি তথা সাহিত্যিক গৰাকীৰ আজি মৃত্যুৰ বাতৰি বিয়পি পৰাৰ লগে লগে সমগ্র গোলাঘাটত এক শোকৰ পৰিবেশে বিৰাজ কৰে। তেওঁৰ এই প্ৰস্থানত  গোলাঘাটৰ বিভিন্ন অনুষ্ঠান-প্ৰতিষ্ঠান আৰু গুণমুগ্ধই  তেওঁৰ আত্মাৰ চিৰশান্তি কামনা কৰি শেষ শ্ৰদ্ধাঞ্জলিৰে বিদায় জনায়।