হিমন্ত বিশ্বই স্বাস্থ্য বিভাগৰ দায়িত্ব লোৱাৰ পাছতেই চিকিৎসকৰ পদত্যাগৰ ঢৌ; গুৱাহাটীৰ ১৬জন,যোৰহাটৰ ১৩জন আৰু ডিব্ৰুগড়ৰ অসম মেডিকেল কলেজ আৰু হাস্পতালৰ ১১জনৰ পদত্যাগ

চৰকাৰী চিকিৎসা মহাবিদ্যালয়সমূহত থকা স্বাস্থ্যসেৱাৰ বাবে এক উদ্বেগজনক খবৰ৷ শেহতীয়াকৈ গুৱাহাটী চিকিৎসা মহাবিদ্যালয় আৰু চিকিৎসালয়ৰ ১৬গৰাকী চিকিৎসকে পদত্যাগ পত্ৰ দাখিল কৰিছে।

ইয়াৰ উপৰিও যোৰহাট মেডিকেল কলেজ এণ্ড হাস্পতালৰ ১৩ গৰাকী চিকিৎসকে পদত্যাগ কৰাৰ লগতে ডিব্ৰুগড়ৰ অসম চিকিৎসা মহাবিদ্যালয় আৰু চিকিৎসালয়ৰ পৰা ১১ গৰাকী চিকিৎসকে পদত্যাগ কৰাৰ খবৰ পোৱা গৈছে।

চিকিৎসকৰ পদত্যাগৰ তালিকাত শিলচৰ, নলবাৰী, কোকৰাঝাৰ আৰু ডিফু চিকিৎসা মহাবিদ্যালয় আৰু চিকিৎসালয়ৰ নামো আছে।খবৰ অনুসৰি এই চিকিৎসকসকলৰ বহু পদত্যাগ এতিয়াও বিভাগে মানি লোৱা নাই।

সূত্ৰই জনোৱা মতে, জিএমচিএইচ আৰু এএমচিএইচত এটাকৈ পদত্যাগ পত্ৰ গ্ৰহণ কৰা হৈছে।অসমত বিগত পাঁচ বছৰত ১৭৪ গৰাকী চিকিৎসকে চৰকাৰী চাকৰি এৰিছে।

বিশেষ সূত্ৰৰ মতে, এই পদত্যাগৰ মূল কাৰণ হৈছে কম দৰমহা আৰু দুৰ্বল স্বাস্থ্যসেৱাৰ সুবিধাৰ লগতে চৰকাৰী চিকিৎসালয়সমূহত কৰ্মৰ হেঁচা।তদুপৰি চিকিৎসকৰ ক্ষেত্ৰত চৰকাৰৰ কঠোৰ নিৰ্দেশনাও তেওঁলোকৰ বাবে অস্বস্তিজনক বুলি দাবী কৰিছে।