অসম: ৪৫ সংখ্যক কাৰ্বি যুৱ মহোৎসৱ আৰম্ভ

উত্তৰ-পূবৰ আটাইতকৈ পুৰণি তথা সৰ্ববৃহৎ নৃগোষ্ঠীয় মহোৎসৱ কাৰ্বি যুৱ মহোৎসৱৰ ৪৫ সংখ্যক ২০১৯ সংস্কৰণ ইয়াৰ কাৰ্বি আংলং জিলাৰ তাৰালাংচ’ৰ কাৰ্বি পিপলছ হলত শুকুৰবাৰে পুৱাৰ পৰা আৰম্ভ হৈছে।

বিশ্বনাথ চাৰিআলি, দমৰা (কামৰূপ) আৰু উমৰাংচ’ৰ লগতে বিভিন্ন ঠাইৰ মুঠ ২৬টা কাৰ্বি সাংস্কৃতিক দলে ভাগ লোৱা ৰং কেতং– কাৰ্বি পৰম্পৰাগত শোভাযাত্ৰাৰে অনুষ্ঠানটো আৰম্ভ হয়।

মহোৎসৱ চৌহদৰ ভিতৰত থকা নিজৰ নিজৰ শিবিৰৰ পৰা পৰম্পৰাগত সাজত ওলাই আহি নৃত্যশিল্পীসকলে উদ্বোধনৰ ঠাইত উপস্থিত হয়।

প্ৰতীকী ঢাল আৰু তৰোৱাল আৰু জনগোষ্ঠীটোৰ পৰম্পৰাগত দণ্ডৰ সৈতে বাহিৰ হোৱা কিল’মিটাৰ জোৰা বৰ্ণিল শোভাযাত্ৰাটোৱে সকলোৰে দৃষ্টি আকৰ্ষণ কৰিবলৈ সক্ষম হয়।

কাৰ্বি আংলং স্বায়ত্তশাসিত পৰিষদৰ মুখ্য কাৰ্য্যবাহী সদস্য তুলিৰাম ৰংহাঙে হাজাৰ হাজাৰ অংশগ্ৰহণকাৰী, সাংস্কৃতিক কৰ্মী, গৱেষক, সাংবাদিক আৰু মহোৎসৱৰ আয়োজকসকলৰ উপস্থিতিত ৪৫ সংখ্যক কে ৱাই এফ উদ্বোধন কৰে।

চি ই এম ৰংহাঙে কয়, “এতিয়ালৈকে কৰা উন্নয়ন পৰিষদৰ নিজা ৰাজহেৰে কৰা হৈছে। চুক্তিৰ ধন এতিয়াও আহি পোৱা নাই আৰু তেতিয়া অধিক উন্নয়ন কৰা হ’ব। কাৰ্বি পিপলছ হলৰ সীমাৰ দেৱালখনো সজা হ’ব।”

পূৰ্বে কাৰ্বি সাংস্কৃতিক সংস্থাৰ সভাপতি চন্দ্ৰ সিং ক্ৰ’ৱে সাধাৰণ সম্পাদক বিদ্যা সিং ৰংপি আৰু কাৰ্বি ৰজা হৰসিং ৰংহাং আৰু দমৰা (কামৰূপ)ৰ কাৰ্বি ৰজা ৰামসিং ৰংহাঙকে ধৰি বিশিষ্ট অতিথিৰ উপস্থিতিত কাৰ্বি সাংস্কৃতিক সংস্থাৰ পতাকা উত্তোলন কৰে।

ক্ৰ’ৱে কয় ভূমি সম্পৰ্কীয় সমস্যা থকাৰ বাবে কাৰ্বি যুৱ মহোৎসৱ থলীলৈ অহা ৰাস্তাটো এতিয়াও নিৰ্মাণ হোৱা নাই।

পথটো নিৰ্মাণক লৈ পথৰ দুয়ো কাষৰ লোক নিৰ্বিকাৰ।

আৱাসীসকলৰ সীমাৰ দেৱাল আৰু গে’টসমূহ নিৰ্মাণ হ’লেহে পথটো বহল কৰিব পৰা হ’ব, তেওঁ কয়।