ৰঞ্জিত দাসে শিষ্টাচাৰ আৰু মূল্যবোধৰ সকলো সীমা চেৰাই গৈছে : ৰিপুন বৰা

ৰাফেল বিমান ক্ৰয়ক কেন্দ্ৰ কৰি কংগ্ৰেছে চলোৱা ৰাফেল কেলেংকাৰীৰ প্ৰচাৰক ‘অপ-প্ৰচাৰ’ আখ্যা দি তথা জনসাধাৰণক বিপথে পৰিচালনা কৰাৰ অভিযোগ তুলি আজি বিজেপিয়ে ৰূপায়ণ কৰা প্ৰতিবাদী সমদলত ভাষণ প্ৰদান কৰি বিজেপিৰ সভাপতি ৰঞ্জিত দাসে ৰাহুল গান্ধীক কটাক্ষ কৰি ‘ননসেন্স সাংসদ’ আখ্যা দিয়ে।

ৰঞ্জিত দাসৰ উক্ত বক্তব্যৰ তীব্ৰ প্ৰতিক্ৰিয়া প্ৰকাশ কৰি অসম প্ৰদেশ কংগ্ৰেছৰ সভাপতি ৰিপুন বৰাই ৰঞ্জিত দাসৰ এই বক্তব্যই ‘সীমা চেৰাই যোৱা’ বুলি মন্তব্য কৰে। সংবাদ মাধ্যমলৈ প্ৰেৰণ কৰা এক ভিডিঅ’যোগে বৰাই কয় ‘এইটো অতি অসাংবিধানিক আৰু দুৰ্ভাগ্যজনক কথা।‘

কংগ্ৰেছৰ ফালৰ পৰা বিজেপি সভাপতি গৰাকীৰ এই মন্তব্যক তীব্ৰ ভাষাৰে গৰিহনা দিছে বুলি উল্লেখ কৰি বৰাই লগতে কয়, ‘ৰঞ্জিত দাসে এনে উদ্ভট মন্তব্য দি তেওঁৰ আৰু বিজেপি দলৰ চিন্তা-চৰ্চা কিমান পৰ্য্যায়ৰ সেইটো দাঙি ধৰিছে। দাসে শিষ্টাচাৰ আৰু মূল্যবোধৰ সকলোবোৰ সীমা চেৰাই গৈছে।‘

তেওঁ প্ৰধান মন্ত্ৰী নৰেন্দ্ৰ মোদী আৰু বিজেপি সভাপতি অমিত শ্বাহক ৰঞ্জিত দাসৰ ওপৰত ব্যৱস্থা ল’বলৈ আহ্বান জনাই কয়, ‘আপোনালোকৰ লগৰে এজন সাংসদক তথা পৃথিবীৰ প্ৰাচীনতম সৰ্ববৃহৎ দল হিচাপে কংগ্ৰেছক যি ‘ননসেন্স’ উপাধিৰে সম্বোধন কৰিছে, গতিকে আপোনালোক দুজনে ৰঞ্জিত দাসৰ ওপৰত ব্যৱস্থা ল’ব লাগে।‘

ভিডিঅ’টোৰ জৰিয়তে ৰিপুন বৰাই দেশবাসী তথা কংগ্ৰেছ দলৰ ওচৰত ৰঞ্জিত দাসক ৰাজহুৱাভাৱে ক্ষমা খুজিবলৈ দাবী জনায়।