বিশাল সমাৱেশ পাতি মুখ্য মন্ত্ৰী সোণোৱালক প্ৰদান কৰা হ’ব ‘জাতীয় খলনায়ক’ৰ উপাধি

ৰাজ্যৰ মুখ্য মন্ত্ৰী সৰ্বানন্দ সোণোৱালক প্ৰদান কৰা হ’ব জাতীয় খলনায়কৰ উপাধি। আজি শিৱসাগৰত অনুষ্ঠিত এক সংবাদমেলত সংগ্ৰামী যুৱ-ছাত্ৰ পৰিষদৰ সভাপতি দেৱজিত দত্তই এই কথা ঘোষণা কৰে।

চৰকাৰে জাতিধ্বংসী নাগৰিকত্ব সংশোধনী বিধেয়ক গৃহীত কৰিলেই এখন বিৰাট সমাৱেশ পাতি অসমৰ প্ৰতিগৰাকী বুদ্ধিজীৱিক আমন্ত্ৰণ কৰি সোণোৱালক জাতীয় খলনায়কৰ বঁটা প্ৰদান কৰা হ’ব বুলি সংবাদমেলত দত্তই মন্তব্য কৰে।

আনহাতে মুখ্য মন্ত্ৰী সোণোৱালে যোৱা সোমবাৰে শিৱসাগৰত এক নিৰ্বাচনী সভাত নাগৰিকত্ব সংশোধনী বিধেয়কৰ বিৰুদ্ধে আন্দোলন কৰি থকা সংগঠনসমূহৰ উচটনিত বহু যুৱক উগ্ৰপন্থী সংগঠনলৈ ঢাপলি মেলা বুলি কৰা মন্তব্যৰ বিৰোধিতা কৰি দত্তই কয় যে ইয়াৰ বাবে কেন্দ্ৰ চৰকাৰ আৰু ৰাজ্য চৰকাৰ হে দায়ী।