নৰৱে’ৰ চলচ্চিত্ৰ সন্মানীয় ‘আমান্দা বঁটা’ লাভ কৰা আদিল হুছেইনক অভিনন্দন মুখ্য মন্ত্ৰী সোণোৱালৰ
নৰৱে’ৰ ৰাষ্ট্ৰীয় চলচ্চিত্ৰ মহোৎসৱত ‘হোৱাট উইল পিপ’ল চে’ ছবিত কৰা সাৱলীল অভিনয়ৰ বাবে শ্ৰেষ্ঠ অভিনেতা হিচাপে সন্মানীয় ‘আমান্দা বঁটা’ লাভ কৰি অসমলৈ গৌৰৱ কঢ়িয়াই অনা অভিনেতা আদিল হুছেইনক মুখ্য মন্ত্ৰী সৰ্বানন্দ সোণোৱালে আন্তৰিক অভিনন্দন জ্ঞাপন কৰে।
আজি এক প্ৰেছ বিবৃতিৰ জৰিয়তে মুখ্য মন্ত্ৰী সোণোৱালে অভিনেতাগৰাকীক অভিনন্দন জনায় কয় যে হুছেইনে ইতিমধ্যে বলিউদৰ লগতে হলিউদৰ চিনেমাত অতুলনীয় অভিনয়ৰে সমগ্ৰ বিশ্ববাসীৰ দৃষ্টি আকৰ্ষণ কৰাটো আমাৰ বাবে গৌৰৱৰ বিষয়।
মুখ্য মন্ত্ৰীগৰাকীয়ে লগতে কয় যে তেওঁৰ অনন্য অভিনয়ে ইতিমধ্যে দেশৰ সীমনা পাৰ হৈ বিশ্বৰ বিভিন্ন দেশৰ সংস্কৃতি প্ৰেমী তথা চলচ্চিত্ৰ প্ৰেমী দৰ্শক, চলচ্চিত্ৰ সমালোচকৰ দৃষ্টি আকৰ্ষণ কৰিবলৈ সক্ষম হৈছে।
শেহতীয়াকৈ নৰৱে’ৰ সন্মানীয় ‘আমান্দা বঁটা’ এই গৰাকী অসম সন্তানে লাভ কৰাটো ৰাজ্যখনৰ সংস্কৃতি প্ৰেমী ৰাইজৰ বাবে অত্যন্ত গৌৰৱ তথা প্ৰেৰণাৰ বিষয় বুলিও মুখ্য মন্ত্ৰীয়ে কয়।
উল্লেখযোগ্য যে অনাগত দিনসমূহতো আদিল হুছেইনে তেওঁৰ অনবদ্য অভিনয় প্ৰতিভাৰে বিশ্বৰ বিভিন্ন প্ৰান্তৰ চলচ্চিত্ৰ বঁটা লাভেৰে ৰাজ্যবাসীক আৰু অধিক গৌৰৱান্বিত হোৱাৰ সুযোগ প্ৰদান কৰিব বুলিও মুখ্য মন্ত্ৰীয়ে আশা প্ৰকাশ কৰে।