জুইত কয়লা ট্ৰাক-টেংকাৰ-জে চি বি, শিৱসাগৰত বিধ্বংসী অগ্নিকাণ্ড ||Video||

দেওবাৰে সন্ধিয়া শিৱসাগৰৰ ভটীয়াপাৰত এক বিধ্বংসী অগ্নিকাণ্ড সংঘটিত হয়। ভটীয়াপাৰৰ ভাস্কৰজ্যোতি চিনেমা হলৰ পিছফালে থকা অশোক লিলেন্দৰ ডিলাৰৰ কাষতে অগ্নিকাণ্ডটো সংঘটিত হৈছে।

বাতৰি লিখাৰ পৰলৈকে অৱশ্যে অগ্নিনিৰ্বাপক বাহিনী আৰু অ’ এন জি চিয়ে জুই নুমুৱাবলৈ  সক্ষম হৈছে।

অগ্নিকাণ্ডটোত দুখন কয়লা ভৰ্তি ট্ৰাক, দুখন তেলৰ টেংকাৰৰ লগতে এখন জেচিবি জাহ যায়। জুইৰ ক’লা ধোঁৱাই সমগ্ৰ অঞ্চলটো চানি ধৰাত অঞ্চলটোত হাহাকাৰ সৃষ্টি হয়।

ট্ৰাক দুখন কয়লাৰে ভৰ্তি থকাৰ বিপৰীতে টেংকাৰ দুখনত তেল আছিল নে নাই এতিয়ালৈকে জানিব পৰা হোৱা নাই। কিন্তু প্ৰত্যক্ষদৰ্শীৰ মতে ঘটনাটোৰ সময়ত তেওঁলোকে কেইবাটাও বিস্ফোৰণৰ শব্দ শুনিছিল।

ভাস্কৰজ্যোতি চিনেমা হলত সেই সময়ত চিনেমা চাই থকা দৰ্শকৰ মাজত হুৱাদুৱা লাগে আৰু আধাতে চিনেমা এৰি দৰ্শকসকল দৌৰাদৌৰিকৈ ওলাই অহাৰ ফলত অঞ্চলত বৃহৎ যান-জঁটৰো সৃষ্টি হয়।

জুই ইমানেই তীব্ৰ আছিল যে বহু ওপৰলৈ ডাঠ ক’লা ধোঁৱাই আৱৰি পেলাইছিল সমগ্ৰ অঞ্চলটো।

ঘটনাৰ কাৰণ এতিয়ালৈকে স্পষ্ট হোৱা নাই যদিও সন্দেহ কৰা মতে অশোক লিলেন্দৰ গাড়ী চাৰ্ভিচিং কৰাৰ সময়ত গাড়ীৰ পৰা উলিওৱা পুৰণি ম’বিলবোৰ সেই ঠাইত পেলাই দিয়াৰ ফলত এটা পুখুৰীত তেলৰ চামনি পৰিছিল।

সন্ধিয়া কিবা প্ৰকাৰে পুখুৰীটোত পৰি থকা তেলত জুই লাগে বুলি সন্দেহ কৰা হৈছে।