ৰাজ্যত তৃতীয় আৰু চতুৰ্থ বৰ্গৰ প্ৰথম পৰ্যায়ৰ নিযুক্তি পৰীক্ষা, বন্ধ ইণ্টাৰনেট সেৱা, প্ৰৱেশপত্ৰত ভুলৰ সমাহাৰ

তৃতীয় আৰু চতুৰ্থ বৰ্গৰ নিযুক্তি পৰীক্ষাৰ আজি প্ৰথম পৰ্যায়ৰ পৰীক্ষা কঠোৰ নিৰাপত্তা ব্যৱস্থাৰ মাজৰে ৰাজ্যৰ ২৪ খন জিলাত অনুষ্ঠিত কৰা হয়৷ পৰীক্ষাৰ সময়ত কোনো স্থানৰ পৰা কোনো অপ্ৰীতিকৰ ঘটনাৰ খবৰ অহা নাই যদিও প্ৰৱেশ পত্ৰত থকা বিসংগতিৰ বাবে বহু কেন্দ্ৰত কিছু বেমেজালিৰ সৃষ্টি হোৱা দেখা যায়৷

বিশেষকৈ কোকৰাঝাৰৰ পৰাক্ষা কেন্দ্ৰত তেনে বেমেজালি দেখা যায়৷ জানিব পৰা মতে কোকৰাঝাৰ জিলাত পৰীক্ষাত অৱতীৰ্ণ হ’বলৈ অহা প্ৰায় শতাধিক পৰীক্ষাৰ্থীৰ এডমিট কাৰ্ডত পৰীক্ষা কেন্দ্ৰৰ ভুল ঠিকনা দিয়াত বিমোৰত পৰিবলগীয়া হয় বহু পৰীক্ষাৰ্থী৷ গোসাইগাঁও মহকুমাৰ জাৰাগুৰীত পৰীক্ষা কেন্দ্ৰত অনুষ্ঠিত হ’বলগীয়া এডমিট কাৰ্ডত ভুলকৈ ডাকঘৰ ছালাকাটি বুলি উল্লেখ কৰাত পৰীক্ষাৰ্থীসকলে পুৱা ছালাকাটিত উপস্থিত হৈ কেন্দ্ৰ বিচাৰি হাবাথুৰি খায়৷

পৰীক্ষা কেন্দ্ৰ বিচাৰি নোপোৱাত উত্তপ্ত পৰিস্থিতিৰ৷ সৃষ্টি হয়৷ কোকৰাঝাৰ জিলাৰ অতিৰিক্ত উপায়ুক্ত শুভৰাম আদিত্য বৰাই ছালাকাটিত উপস্থিত হৈ উত্তেজিত পৰীক্ষাৰ্থী সকলক শান্ত কৰি এঘণ্টাৰ অধিক পলমকৈ পৰীক্ষাত বহাৰ ব্যৱস্থা কৰি দিয়ে৷কোকৰাঝাৰ জিলাত সৰ্বমুঠ ৭৬ কেন্দ্ৰত ৫১,৮৯৫ গৰাকী নিবনুৱা যুৱক যুৱতী লিখিত পৰীক্ষাত অৱতীৰ্ণ হয় ৷

ইয়াৰে ৪০,০৪৭ গৰাকী প্ৰাৰ্থীয়ে পুৱা অনুষ্ঠিত পৰীক্ষাত আৰু ১১,৮৪৮ গৰাকী প্ৰাৰ্থীয়ে বিয়লি পৰীক্ষাত বহে৷ উল্লেখ্য অসমৰ ২৪ জিলাত মুঠ ১৪,৩০,৩৩৭ গৰাকী প্ৰাৰ্থীয়ে তৃতীয় আৰু চতুৰ্থ বৰ্গৰ নিযুক্তি পৰীক্ষাত বহে।

মুঠ ১,২৫৮টা কেন্দ্ৰত অনুষ্ঠিত হয় আজিৰ পৰীক্ষা। দিনৰ ১০ বজাৰ পৰা ১২ বজালৈ আৰু ২ বজাৰ পৰা ৪ বজালৈ অনুষ্ঠিত হয় পৰীক্ষা। এই পৰীক্ষাৰ বাবে উক্ত সময়ত ২৪ খন জিলাত বন্ধ থাকে ইণ্টাৰনেট সেৱা। পৰৱৰ্তী পৰীক্ষা ২৮ আগষ্টত ২৫ খন জিলাত অনুষ্ঠিত হ’ব