একাদশ শ্ৰেণীৰ পৰীক্ষাৰ প্ৰশ্নকাকত ফাদিল হোৱাৰ পিছতে অসম শিক্ষা বিভাগে গ্ৰহণ কৰিছে কঠোৰ ব্যৱস্থা

শেহতীয়াকৈ উচ্চতৰ মাধ্যমিকৰ প্ৰথম বৰ্ষৰ পৰীক্ষাৰ প্ৰশ্নকাকত ফাদিল হোৱাৰ পিছতে পৰীক্ষা প্ৰক্ৰিয়াৰ অখণ্ডতা ৰক্ষাৰ বাবে কঠোৰ নিৰাপত্তা ব্যৱস্থা গ্ৰহণৰ কথা ঘোষণা কৰিছে অসমৰ শিক্ষা বিভাগে।

শিক্ষামন্ত্ৰী ৰানোজ পেগুৱে বুধবাৰে কয় যে উচ্চতৰ মাধ্যমিকৰ প্ৰথম বৰ্ষৰ পৰীক্ষাৰ প্ৰশ্নকাকত এতিয়া নিৰ্দিষ্ট পৰীক্ষা কেন্দ্ৰলৈ প্ৰেৰণ কৰাৰ পূৰ্বে কেন্দ্ৰীয়ভাৱে সংৰক্ষণ কৰা হ’ব। নিৰাপত্তা আৰু অধিক বৃদ্ধিৰ বাবে কাগজ-পত্ৰসমূহ স্থানীয় আৰক্ষী থানাত মজুত কৰি পৰীক্ষাৰ দিনা বিদ্যালয়লৈ লৈ যোৱা হ’ব বুলি সদৰী কৰিছে।

প্ৰশ্নকাকত ফাদিল হোৱাৰ ফলত ২০২৫ চনৰ ২১ মাৰ্চত পৰীক্ষা বাতিল হোৱাৰ লগতে নিৰ্ধাৰিত পৰীক্ষাৰ এদিন পূৰ্বে প্ৰট’কল উলংঘা কৰাৰ অভিযোগত ১৮খন ব্যক্তিগত বিদ্যালয়ৰ বিৰুদ্ধে অনুশাসনমূলক ব্যৱস্থা গ্ৰহণ কৰা হৈছে বুলি জানিবলৈ দিছে।

একাদশ শ্ৰেণীৰ গণিতৰ প্ৰশ্ন ফাদিল হোৱাৰ ফলত ১৫খন ব্যক্তিগত বিদ্যালয়ৰ এফিলিয়েশ্যন বন্ধ হৈ পৰিছে আৰু অসম ৰাজ্যিক বিদ্যালয় শিক্ষা ব’ৰ্ডে আৰক্ষীৰ এজাহাৰ দাখিল কৰিছে। ফলত ২৪ মাৰ্চৰ পৰা ২৯ মাৰ্চলৈ নিৰ্ধাৰিত  বিষয় সামৰি লোৱা একাদশ শ্ৰেণীৰ সকলো পৰীক্ষা বাতিল কৰা হয়।