অজিত ভূঞাই AIUDF ৰ ওচৰত নিৰ্লজ্জ আত্মসমৰ্পণ কৰি বিবেক, জ্ঞান বিক্ৰী কৰিলে : হিমন্ত

পুনৰ এবাৰ ৰাজ্যসভাৰ সাংসদ অজিত কুমাৰ ভুঞাক আক্ৰমণৰ লক্ষ্য কৰি ল’লে বিজেপি চৰকাৰৰ দক্ষ মন্ত্ৰী ড০ হিমন্ত বিশ্ব শৰ্মাই।

মহা নৱমী উপলক্ষে কামাখ্য মন্দিৰ দৰ্শন কৰিবলৈ গৈ সাংবাদিকৰে হোৱা কথা-বতৰাত মন্ত্ৰীগৰাকীয়ে কটাক্ষ কৰে অজিত ভুঞাক।

তেওঁ কয় ‘ই আমাৰ ওপৰত এক প্ৰণালীৱদ্ধ আক্ৰমণ। যিদিনাখনেই অজিত ভুঞা এআইয়ুডিএফৰ সমৰ্থনত ৰাজ্যসভাৰ সাংসদ হৈছিল সেইদিনাখনেই তেওঁ নিজৰ বিবেক, জ্ঞান সকলোবিলাক বিক্ৰী কৰি থৈছিল। এইটো এটা নিৰ্লজ্জ আত্মসমৰ্পন আছিল।‘

‘আত্মসমৰ্পনকাৰী ব্যক্তিয়ে তেওঁৰ ওচৰত ভজন আৰু বন্দনা কৰাৰ বিকল্প নাথাকে। তেওঁ সেইটো কামেই কৰিব লাগিব আৰু কৰিও আছে।‘ ভুঞাক কটাক্ষ কৰি তেওঁ এইদৰে কয়।

ইপিনে, যোৱা কিছুদিনত বদৰুদ্দিন আজমলক মুখ্যমন্ত্ৰী কৰা আৰু তাৰ পাছত আৰৱী ভাষাত বেনাৰ আদি লিখা কালি মিঞা মিউজিয়ামৰ দাবী তোলা, এই গোটেইবোৰ এনেকুৱা নহয় যে কোনোবাই হঠাৎ মুখৰ পৰা কৈ দিয়া কথা নহয় বুলি মন্ত্ৰীগৰাকীয়ে উল্লেখ কৰে।

তেওঁ লগতে কয় ‘অসমৰ সভ্যতা সংস্কৃতিৰ ওপৰত কিছুদিনৰ পৰা প্ৰণালীৱদ্ধ আক্ৰমণ লক্ষ্য কৰি আহিছো। এটা সময়ত নামনি আৰু মধ্য অসমত এই শক্তিবিলাক কেন্দ্ৰীভুত হৈ আছিল। কিছুদিনৰ পৰা এটা ট্ৰেণ্ড দেখিছো সভ্যতা সংস্কৃতিৰ যিসমূহ প্ৰতীক আছে সকলোতে এচাম ব্যক্তিয়ে আক্ৰমণ কৰিব খোজে।

‘‘কা’ আন্দোলনৰ সময়তো শংকৰদেৱ কলাক্ষেত্ৰখনক ভাঙিবলৈ এচাম লোকে লক্ষ্য কৰি লৈছিল। সাধাৰণ আন্দোলনকাৰীসকল নহয়, এচাম নিৰ্দিষ্ট দুস্কৃতিকাৰীয়ে কলাক্ষেত্ৰৰ গেট-শৰাই আদি ভাঙি পেলাইছিল। কিন্তু তেওঁলোক সফল নহ’ল।‘ হিমন্তই কয়।

‘এতিয়া লাহে লাহে কলাক্ষেত্ৰখনৰ ওপৰতো তেওঁলোকৰ চকু পৰিছে।‘ তেওঁ এইদৰে উল্লেখ কৰি লগতে কয় ‘ইয়াত অন্য এক সভ্যতা -সংস্কৃতিৰ সংগ্ৰহালয় স্থাপন হোৱাৰ কথাই আহিব নোৱাৰে। গতিকে বিধায়ক শ্বেৰমান আলিৰ এই ধাৰণাক সম্পূৰ্ণৰূপে প্ৰত্যাখ্যান কৰিছো।‘ হিমন্তই কয়।

হিমন্তই দাবী জনাই কয় ‘অসম চৰকাৰে স্পষ্ট কৰি দিব খুজিছে শংকৰদেৱ কলাক্ষেত্ৰত কোনোধৰণৰ মিঞা মিউজিয়াম স্থাপন কৰিবলৈ দিয়া নহ’ব।‘