সুস্মিতা দেবক উভতি ধৰিলে বন মন্ত্ৰী পৰিমল শুক্লবৈদ্যই

‘ক্ষমতাৰ অপব্যৱহাৰৰ প্ৰশ্নই নুঠে। ক্ষমতাৰ আমি ব্যৱহাৰহে কৰিছো।’ কাছাৰৰ উচ্ছেদক লৈ প্ৰাক্তন সাংসদ সুস্মিতা দেবক উভতি ধৰি বৃহস্পতিবাৰে এই মন্তব্য বন মন্ত্ৰী পৰিমল শুক্লবৈদ্যৰ।

বন মন্ত্ৰী শুল্কবৈদ্যৰ গৃহ সমষ্টি ধলাইত ৮২টা পৰিয়ালক উচ্ছেদ কৰা ঘটনাৰ আঁৰত ৰাজনৈতিক চক্ৰান্ত থকা বুলি অভিযোগ কৰিছিল শিলচৰৰ প্ৰাক্তন কংগ্ৰেছ সাংসদ তথা সৰ্ব ভাৰতীয় মহিলা কংগ্ৰেছৰ সভানেত্ৰী সুস্মিতা দেবে৷ তাৰ পাছতে গুৱাহাটীত এক সংবাদমেলত উপস্থিত শুক্লবৈদ্যই দেবক উদ্দেশ্যি এই মন্তব্য কৰে।

উল্লেখ্য যে কাছাৰ জিলাৰ ধলাই সমষ্টিৰ অন্তৰ্গত ৰজনীখাল বনাঞ্চলত বসবাস কৰি অহা ৮২টা পৰিয়ালৰ লোকক যোৱা ৭ জুনত বন বিভাগে উচ্ছেদ কৰিছিল। আৰু মঙলবাৰে সন্ধিয়া উচ্ছেদস্থল পৰিদৰ্শন কৰি বন মন্ত্ৰী পৰিমল শুক্লবৈদ্যক তীব্ৰ সমালোচনা কৰে সুস্মিতা দেৱে৷

তাৰ পাছতে বনমন্ত্ৰীগৰাকীয়ে সুস্মিতা দেবক উভতি ধৰি কয় ‘কংগ্ৰেছৰ শাসনকালতো ৰজনীখালত দুবাৰকৈ উচ্ছেদ হৈছিল। কিন্তু উচ্ছেদ কৰাৰ পাছতো আকৌ অবৈধভাৱে দখল হ’বলৈ ধৰিলে। মেডাম সুস্মিতা দেবে যি কথা কৈছে সেই কথাটোত আমি যাব বিচৰা নাই। কিন্তু সাম্প্ৰদায়িকভাৱে এই উচ্ছেদ অভিযান হোৱা নাই।’

তেওঁ আৰু কয় যে জীয়াই থাকিবলৈ হ’লে বনাঞ্চল সংৰক্ষণ কৰা অতিকৈ প্ৰয়োজন। লগতে উচ্ছেদ কৰাৰ প্ৰয়োজনীয়তা থকাৰ বাবে উচ্ছেদ কৰা হৈছে বুলিও তেওঁ মন্তব্য কৰে।

ইপিনে, শিলচৰৰ প্ৰাক্তন সাংসদগৰাকীয়ে বিজেপি চৰকাৰে ক্ষমতাৰ অপ-ব্যৱহাৰ কৰা বুলি কৰা অভিযোগৰ প্ৰতিক্ৰিয়া প্ৰকাশ কৰি শুক্লবৈদ্যই কয় ‘আমি কোনো ক্ষমতাৰ অপ-ব্যৱহাৰ কৰা নাই। উচ্ছেদ কৰিবলৈ হ’লে পুলিচ-প্ৰশাসন লাগিবই। ক্ষমতাৰ অপব্যৱহাৰৰ প্ৰশ্নই নুঠে। ক্ষমতাৰ আমি ব্যৱহাৰহে কৰিছো।’