বিদ্যালয়ত অসমীয়া ভাষা পঢ়া সকলহে চৰকাৰী চাকৰিৰ বাবে যোগ্য হ’ব; নতুন আইন অনাৰ প্ৰস্তুতি চৰকাৰৰ

অসমত চাকৰি কৰিব নোৱাৰিব মন্ত্ৰী হিমন্ত বিশ্ব শৰ্মাৰ সন্তানে। কিয়নো অসমৰ দীৰ্ঘকালৰ শিক্ষা মন্ত্ৰী ড০ হিমন্ত বিশ্ব শৰ্মাৰ সন্তান পঢ়ে বহিঃৰাজ্যত থকা ভাৰতৰ আগশাৰীৰ ব্যক্তিগত খণ্ডৰ বিদ্যালয়ত।

অসমীয়া ভাষাৰ পাঠ্যক্ৰম তেওঁলোকে আজিলৈকে পঢ়া নাই তথা তেওঁলোকে নাজানে অসমীয়া লিখিব। গতিকে অসমত চাকৰি কৰিবলৈ তেওলোক যোগ্য নহয় বুলি জনতা ভৱনত অনুষ্ঠিত সংবাদমেলত মন্তব্য কৰে মন্ত্ৰী গৰাকীয়ে।

“অতি সোনকালে চৰকাৰী চাকৰিৰ ক্ষেত্ৰত এটা চৰ্ত বান্ধি দিয়া হ’ব যে তেওঁলোকে অসমীয়া জনাটো বাধ্যতামূলক। অসমীয়া বিষয়টো নপঢ়িলে অনা অসমীয়া যুৱক-যুৱতীয়ে চাকৰি ল’ব নোৱাৰিব। মোৰ ল’ৰা-ছোৱালীৰো পাঠ্যক্ৰমত অসমীয়া বিষয় নাই কাৰণ তেওঁলোকে বাহিৰত পঢ়ি আছে। তেওঁলোকে কেতিয়াও অসমত চাকৰি কৰিব নোৱাৰিব। অসমীয়া হ’লেও নোৱাৰিব,” মন্ত্ৰী হিমন্ত বিশ্ব শর্মাই সংবাদমেলত কয়।

ইপিনে, চলিত বৰ্ষৰ ভিতৰতে অসমীয়া বিষয় বা ভাষা জনাটো বাধ্যতামূলক কৰিবলৈ চৰকাৰে এখন আইন প্ৰণয়ন কৰিব বুলিও মন্ত্ৰী গৰাকীয়ে সংবাদমেলত ঘোষণা কৰে।

তেওঁ কয় ‘এই বছৰৰ ভিতৰতে এখন আইন আনিব গৈ আছো মেট্ৰিক বা দশম শ্ৰেণীত যদি MIL ত অসমীয়া বিষয় নাথাকে তেন্তে তেওঁলোকে ভৱিষ্যতে চৰকাৰী চাকৰি নাপাব। সেয়েহে আমাৰ ল’ৰা-ছোৱালীয়েও যদি ডন বস্ক’ত পঢ়ে মাধ্যম ইংৰাজী হ’লেও এটা বিষয় অসমীয়া হোৱাটো জৰুৰী হ’ব।’

তদুপৰি, আই.এছ বিষয়াসকল অসমলৈ আহিলে তেওঁলোকে বাধ্যতামূলকভাৱে অসমীয়া ভাষা লিখিব আৰু পঢ়িব শিকি ল’ব লাগে বুলি উল্লেখ কৰি হিমন্তই লগতে কয় ‘অথচ মোৰ ল’ৰাই এতিয়া অসমীয়া লিখিব নোৱাৰিব। ক’ব জানে কিন্তু সি লিখিব নাজানে। সেয়েহে আমি এইবাৰ এই আইনখন আৰম্ভ কৰিম।’

অৱশ্যে, এই আইনৰ আওতাৰ পৰা বৰাক উপত্যকা, বড়োলেণ্ড টেৰিটৰিয়েল কাউন্সিলক বাদ দিয়া হ’ব বুলি মন্তব্য কৰি তেওঁ কয় ‘আন অঞ্চলত কোনোবাই যদি হিন্দী স্কুল কৰিছে, আন কোনোবাই যদি ইংৰাজী বিদ্যালয় খুলিছে কোনোবাই যদি গুজৰাটী বিদ্যালয় কৰিছে তেন্তে তেওঁলোকে অসমীয়া বিষয়টো বাধ্যতামূলকভাৱে পঢ়াবই লাগিব। আইন সকলোৰে বাবে সমান হ’ব ইয়াৰ পৰা কোনো আঁতৰিব নোৱাৰে।‘

তাৎপয্যপূৰ্ণভাৱে হোজাই আৰু লামডিঙত থকা ল’ৰা-ছোৱালীয়েও অসমীয়া বিষয় পঢ়াটো বাধ্যতামূলক হ’ব বুলি মন্তব্য কৰে হিমন্ত বিশ্ব শৰ্মাই।