পুনৰ যোৰহাট বিজ্ঞান আৰু প্ৰযুক্তিবিদ্যা প্ৰতিষ্ঠানৰ ৬ জনকৈ কৰ্মচাৰীক বৰ্খাস্ত; প্ৰতিক্ৰিয়া বৰ্খাস্ত কৰ্মচাৰীৰ

যোৰহাট বিজ্ঞান আৰু প্ৰযুক্তিবিদ্যা প্ৰতিষ্ঠান (জিষ্ট)ৰ ৬ জন ঠিকাভিত্তিক কৰ্মচাৰীক চাকৰিৰ পৰা পুনৰ বৰ্খাস্ত কৰাৰ নিৰ্দেশ জাৰি কৰিছে কাৰিকৰী সঞ্চালকালয়ে।

বৰ্খাস্ত কৰাৰ নিৰ্দেশ দিয়া কৰ্মচাৰী কেইজন হ’ল ক্ৰমে হেমন্ত গগৈ, মানস প্ৰতিম গগৈ, ৰমেশ বৰা, ৰিমঝিম গগৈ, মুকুল গগৈ আৰু নিলু বাল্মিকী।

ইয়াক লৈ এতিয়া তীব্ৰ প্ৰতিক্ৰিয়া প্ৰকাশ কৰিছে কৰ্মচাৰী কেইজন। ২০০৮ চনৰ পৰাই স্থানীয় এই চতুৰ্থবৰ্গৰ কৰ্মচাৰীকেইজনে নিম্নতম পাৰিতোষিক লৈয়ে মহাবিদ্যালয়খনত নিজৰ দায়িত্ব পালন কৰি আহিছে।

অৱশ্যে যোৱা ২০১৭ চনত মাত্ৰ তিনিমাহৰ বাবে কোষাগাৰৰ পৰা দৰমহা লাভ কৰিছিল যদিও এতিয়া পুনৰ কলেজ কৰ্তৃপক্ষৰ পৰাই দৰমহা প্ৰদান কৰা হৈছে বুলি মন্তব্য কৰিছে।

লগতে ক’ভিডসৃষ্ট পৰিবেশৰ বাবে শেহতীয়াকৈ তিনিমাহ দৰমহা লাভ কৰা নাই বুলিও অৱগত কৰিছে কৰ্মচাৰীকেইজনে।

সেয়ে এই ক্ষেত্ৰত উৰ্ধতম কৰ্তৃপক্ষক পূৰ্বে নিলম্বিত তিনিগৰাকীকৈ স্থায়ী কৰ্মচাৰীৰ সৈতে তেওঁলোকক নিমিলাই উচিত ব্যৱস্থা গ্ৰহণ কৰিবলৈ কাতৰ অনুৰোধ জনাইছে।

উল্লেখযোগ্য এই যে ইয়াৰ পূৰ্বে বক্ৰ পথৰে নিযুক্তি পোৱা নৱনীতা বৰঠাকুৰ, বিদ্যাৰ্থী বৰা আৰু অজন্তা দত্তক চাকৰিৰ পৰা বৰ্খাস্ত কৰা হৈছিল।

সদৌ অসম ছাত্ৰ সন্থাৰ কাকজান আঞ্চলিকে মহাবিদ্যালয়খনৰ কৰ্মচাৰী নিযুক্তি তথা আন্ত:গাঁথনিকে ধৰি বহু ক্ষেত্ৰত সংঘটিত হোৱা দুনীতিৰ বিৰুদ্ধে অসমৰ মুখ্যমন্ত্ৰী আৰু শিক্ষামন্ত্ৰীক জিলা উপায়ুক্তৰ যোগেদি অভিযোগ দিছিল।

সেই অভিযোগৰ ভিত্তিতে যোৱা জুন মাহত তিনিগৰাকীকৈ স্থায়ী আৰু বৰ্তমান ছয় গৰাকীকৈ ঠিকাভিত্তিত কৰ্মৰত কৰ্মচাৰীক বৰ্খাস্ত কৰা হৈছে বুলি জানিব পৰা গৈছে।

ইতিমধ্যে অধ্যক্ষগৰাকীলৈ কাৰিকৰী শিক্ষা সঞ্চালকালয়ৰ পৰা এই বৰ্খাস্ত সন্দৰ্ভত নিৰ্দেশনা প্ৰেৰণ কৰিছে বুলি জানিব পৰা গৈছে।

সঞ্চালকালয়ৰ এই সিদ্ধান্ত এতিয়া ছাত্ৰ সন্থাই আদৰণি জনাই কেৱল নিযুক্তিৰ অনিয়মতে ব্যস্ত নাথাকি বাকী দূৰ্নীতিসমূহকো তদন্তৰ আওতালৈ আনিবলৈ দাবী জনাইছে।