আদালতত প্ৰতীক হাজেলাৰ ভয়ংকৰ অভিযোগ ৰাজ্য চৰকাৰৰ বিৰুদ্ধে : যোগান ধৰা নাছিল বিদেশী ন্যায়াধিকৰণে দিয়া তথ্য

অসম চলি থকা এন আৰ চি উন্নীতকৰণ প্ৰক্ৰিয়াক লৈ চৰকাৰ আৰু এন আৰ চিৰ ৰাজ্যিক সমন্বয়ক প্ৰতীক হাজেলাৰ মাজৰ সংঘাত ক্ৰমে অধিক স্পষ্ট হৈছে। শেহতীয়াকৈ পোহৰলৈ আহিল চৰকাৰৰ বিৰুদ্ধে প্ৰতীক হাজেলাৰ ভয়ংকৰ অভিযোগ। উচ্চতম ন্যায়ালয়ত দিয়া শপতনামাত প্ৰতীক হাজেলাই জনাইছে যে ৰাজ্য চৰকাৰে যদি বিদেশী ন্যায়াধিকৰণে দিয়া তথ্যবোৰ যোগান ধৰিলে হেঁতেন এন আৰ চিৰ কাম অধিক নিখুঁততাৰ সৈতে কৰিব পৰা গ’ল হেঁতেন।

হাজেলাৰ এই ভাষ্যত ৰাজ্যৰ বিজেপি নেতৃত্বাধীন চৰকাৰখনৰ প্ৰকৃত স্বৰূপ ওলাই পৰিছে। কিয়নো এন আৰ চিৰ কাম কৰোৱা বুলি সংবাদ মাধ্যমৰ আগত কৃতিত্ব দাবী কৰি থকা চৰকাৰখনে বিদেশীৰ নাম এন আৰ চিত সোমোৱাৰ বাট ইচ্ছা কৰিয়েই মুকলি ৰখাৰ দৰে হ’ল। ইফালে ইয়াৰ বিপৰীতে চৰকাৰৰ নিজৰ মানুহেই এন আৰ চিৰ কামত ‘বিদেশী’ নিয়োজিত হৈ থকা বাবেই বিদেশীৰ নাম সোমাইছে বুলি সংবাদ মাধ্যমৰ আগত ৰাজহুৱাভাৱে কৈ আহিছে।

তথ্যবোৰ নোপোৱাৰ কথা শপতনামাত উল্লেখ কৰে। এই সন্দৰ্ভত তেওঁ মৰিগাওঁ জিলাৰ এজন ব্যক্তি, যাৰ নাম বিদেশী ন্যায়াধিকৰণে বিদেশী ঘোষণা কৰা সত্ত্বেও এন আৰ চিৰ খচৰাত সোমাইছিল, তেওঁৰ উদাহৰণ দিয়ে। তেওঁ কয় যে বিদেশী ন্যায়াধিকৰণে বিদেশী অৰ্ডাৰৰ কপিবোৰ অসম চৰকাৰৰ মুখ্য সচিবলৈ আৰু গৃহ বিভাগলৈ ব্যৱস্থা গ্ৰহণৰ বাবে প্ৰেৰণ কৰিছিল।

“বিদেশী ন্যায়াধিকৰণৰ নিৰ্দেশটো সাক্ষ্যদিওঁতা (হাজেলা)ৰ জ্ঞাত নাছিল। এই নিৰ্দেশটো সাক্ষ্যদিওঁতা (হাজেলা)ৰ সৈতে ৰাজ্য চৰকাৰে ‘শ্বেয়াৰ’ কৰা নাছিল। অন্যথা সাক্ষ্য দিওঁতাই চূড়ান্ত খচৰা প্ৰকাশ কৰাৰ পূৰ্বে অধিক ভালকৈ নিৰীক্ষণৰ বাবে কিছুমান ব্যৱস্থা গ্ৰহণ কৰাৰ সম্ভাৱনা আছিল।”, নিজৰ শপতনামত হাজেলাই ন্যায়ালয়ক কয়।

নিজৰ শপতনামাত তেওঁ আগষ্টৰ চতুৰ্থ সপ্তাহতহে বিদেশী ন্যায়াধিকৰণৰ নিৰ্দেশটোৰ বিষয়ে অৱগত হোৱা বুলি কয়।

ইয়াৰ পৰা এটা কথা স্পষ্ট হয় যে এন আৰ চিৰ কৃতিত্ব দাবী কৰি থকা আৰু বিদেশীক টালি-টোপোলা বান্ধিবলৈ বাধ্য কৰিম বুলি কৈ থকা চৰকাৰখনে প্ৰকৃততে গোটেই বিষয়টোত এটা ৰহস্যজনক নমনীয়তা দেখুৱাইছে।

নিজৰ দায়িত্বহীনতাৰ বিপৰীতে এন আৰ চিত খেলিমেলিৰ কথা আহিলেই সৰ্বদোষ হাজেলাৰ গাত জাপি দিয়াৰ চেষ্টা কৰি আহিছে চৰকাৰে। ইয়াৰ ফলতে অৱশেষত হাজেলাই ন্যায়ালয়ৰ মজিয়াত চৰকাৰৰ স্বৰূপ উদঙাবলৈ বাধ্য হ’ল।