আন্দোলনৰ ফলশ্ৰুতি : অৱশেষত নিৰ্মাণ হোৱাৰ পথত হালোৱাটিঙৰ সীমান্ত চকী
বিভিন্ন দল সংগঠনৰ আন্দোলন আৰু ৰাইজৰ দীৰ্ঘদিনীয়া দাবীৰ অন্তত অৱশেষত নিৰ্মাণ হোৱাৰ পথত আগবাঢ়িছে শিৱসাগৰ জিলাৰ অসম-নাগালেণ্ড সীমান্তৰ হালোৱাটিঙৰ সীমান্ত চকী। ইতিমধ্যে সীমান্তৰ “এফ ” চেক্টৰত নিৰ্মাণ হ’বলগীয়া সীমান্ত চকীৰ বাবে প্ৰয়োজনীয় ভূমি জিলা প্ৰশাসনে গড়কাপ্তানী বিভাগলৈ হস্তান্তৰ কৰিছে।
উল্লেখযোগ্য যে প্ৰথম অৱস্থাত উক্ত স্থানত সীমান্ত চকী নিৰ্মাণৰ প্ৰস্তুতি চলোৱা হৈছিল যদিও নাগালেণ্ডৰ অবৈধ হস্তক্ষেপৰ বাবে সীমান্ত চকী নিৰ্মাণৰ কাম স্থবিৰ হৈ পৰিছিল। নাগালেণ্ডৰ এনে দুস্কাৰ্যৰ প্ৰতিবাদত হালোৱাটিত ৩০ টাৰো অধিক জাতীয় সংগঠনে একাধিকবাৰ প্ৰতিবাদী কাৰ্যসূচী গ্ৰহণ কৰাৰ লগতে নাগালেণ্ডৰ বিৰুদ্ধে অৰ্থনৈতিক অৱৰোধ কাৰ্যসূচীও ৰূপায়ন কৰিছিল।
শেহতীয়াকৈ যোৱা ১২ চেপ্টেম্বৰত আটাছুৰ আমগুৰি আৰু হালোৱাটিং আঞ্চলিক সমিতিৰ উদ্যোগত তথা আটাছু আমগুৰি সমষ্টিৰ সমুহ আঞ্চলিকৰ সহযোগত ৬১ নং ৰাষ্ট্ৰীয় ঘাইপথ অৱৰোধ কাৰ্য্যসূচী হাতত লৈছিল। আনকি সংগঠনটোৱে সীমান্ত চকী নিৰ্মাণৰ বাবে চাৰিদিনৰ চূড়ান্ত সময়সীমা বান্ধি দিছিল।
অৱশেষত আটাছুৰ দাবীত সেও মানি শিৱসাগৰ জিলা প্ৰশাসনে সীমান্ত চকীৰ নিৰ্মাণৰ কাম খৰতকীয়া কৰাৰ বাবে ব্যৱস্থা ল’বলৈ বাধ্য হয়। যোৱা ১৩ চেপ্টেম্বৰত শিৱসাগৰ জিলা উপায়ুক্তই আটাছুৰ স্থানীয় নেতাক মোৱাইল বাৰ্তা যোগে সীমান্ত চকী নিৰ্মাণৰ বিষয়ে অৱগত কৰে।
সদৌ তাই আহোম ছাত্ৰ সন্থাৰ শিৱসাগৰ মহকুমা সমিতিৰ প্ৰচাৰ সম্পাদক গৌতম দিহিঙ্গীয়াই এক বিবৃতি যোগে এই কথা জানিবলৈ দিছে।