ডিব্ৰুগড়ত অবৈধ আধাৰ কাৰ্ড চক্ৰ উৎখাত : বিলাসী গাড়ীসহ তিনিজন যুৱক আটক

ডিব্ৰুগড় চহৰত চলি থকা এটা অবৈধ আধাৰ কাৰ্ড চক্ৰক উৎখাত কৰিছে ডিব্ৰুগড় আৰক্ষীয়ে।

দেওবাৰে ডিব্ৰুগড় আৰক্ষীয়ে অভিযান চলাই চহৰৰ পল্টন বজাৰত চলাই থকা এটা অবৈধ আধাৰ কাৰ্ডৰ চক্ৰটো উৎখাত কৰাৰ লগতে তিনিজনক লোকক আটক কৰিছে।

অবৈধ আধাৰ কাৰ্ড চক্ৰটোৰ সৈতে জড়িত থকাৰ অভিযোগত আটক কৰা লোককেইজন লখিমপুৰৰ দীপেন দলে(২৭) বিতুপন দেউৰী(৩০) আৰু আইবি দেউৰী বুলি আৰক্ষীয়ে প্ৰকাশ কৰিছে।

পল্টন বজাৰৰ আতিকুৰ ৰহমান নামৰ লোকজনৰ বাসগৃহত আটকাধীন যৱককেইজনে এটা অবৈধ আধাৰ কাৰ্ড চক্ৰ চলাই থকা বুলি আৰক্ষীয়ে বিশেষ সূত্ৰে খবৰ লাভ কৰা বুলি সংবাদ মাধ্যমৰ আগত প্ৰকাশ কৰিছে।

“বিশেষ সূত্ৰৰ খবৰ ভিত্তিত ডিব্ৰুগড়ৰ পল্টন বজাৰত অভিযান চলাই অবৈধ আধাৰ কাৰ্ডৰ চক্ৰটো উৎখাত কৰা হয়।” ডিব্ৰুগড় আৰক্ষী থানাৰ ভাৰপ্ৰাপ্ত আৰক্ষী বিষয়া ৰাজীৱ শইকীয়াই নৰ্থ ইষ্ট নাওৰ আগত কয়।

আৰক্ষীয়ে অভিযান চলাই বহু পৰিমাণৰ আধাৰ কাৰ্ডৰ প-পত্ৰ, ৫ হাজাৰ টকাসহ এখন বিলাসী বাহনো ধনো জব্দ কৰিছে।

“তেওঁলোকে প্ৰস্তুত কৰা ৩০০ আধাৰ কাৰ্ডৰ লগতে এআৰ ০১এম ৮১৩০ নম্বৰৰ টাটা নেক্সন বাহন জব্দ কৰিছো। ডিব্ৰুগড়ত চলি থকা অবৈধ আধাৰ কাৰ্ডৰ চক্ৰসমূহ উৎখাত কৰিবলৈ তদন্ত প্ৰক্ৰিয়া আগুৱাই নিয়া হ’ব।” বিষয়াগৰাকীয়ে লগতে কয়।