বিজেপিৰ বাইক ৰেলীত হেলমেট নোহোৱাকৈ দুচকীয়া বাহনৰ চালকৰ আসনত মন্ত্ৰী হিমন্ত বিশ্ব শৰ্মা

ওডালগুৰি জিলাৰ ভৈৰৱকুণ্ডত এক বাইক ৰেলীত হেলমেট নিপিন্ধাকৈ স্কুটি চলাই থকা অৱস্থাত দেখা গ’ল বিত্ত মন্ত্ৰী হিমন্ত বিশ্ব শৰ্মাক।

সোমবাৰে হিমন্ত বিশ্ব শৰ্মাই বিটিচি নিৰ্বাচনৰ প্ৰচাৰৰ বাবে ওডালগুৰি জিলাত উপস্থিত হৈছিল।

হিমন্ত বিশ্ব শৰ্মাৰ উপৰিও শৰ্মাৰ ঘনিষ্ঠ বুলি পৰিচিত বিজেপি সাংসদ পল্লৱ লোচন দাসকো হেলমেট পৰিধান নকৰাকৈ বাইক চলাই থকা দেখা গৈছে।

‘‘আজি ওডালগুৰিৰ ভৈৰৱকুণ্ডত, মই বিজেপিৰ যুৱ কৰ্মকৰ্তা সকলৰ বাইক ৰেলীত অংশগ্ৰহণ নকৰাকৈ থাকিব নোৱাৰিলো। আমাৰ পাৰ্টিৰ সমৰ্থনত কৰ্মকৰ্তা সকলৰ সৈতে একেলগে উপভোগ কৰি ভাল লাগিল,’’ মন্ত্ৰী হিমন্ত বিশ্ব শৰ্মাই বাইক ৰেলীত অংশগ্ৰহণ কৰি এইদৰে টুইট কৰে।

মন্ত্ৰী শৰ্মাই হেলমেট নিপিন্ধাকৈ স্কুটি চলাই থকাৰ এটা ভিডিঅ’ও ছ’চিয়েল মিডিয়াত শ্বেয়াৰ কৰে।

মটৰ বাহন সংশোধনী আইন ২০১৯ অনুসৰি দুচকীয়া বাহন হেলমেট বিহীনভাৱে চলোৱাটো এক অপৰাধ আৰু এনে নিয়ম ভংগকাৰীক ১০০০ টকা জৰিমনা বিহা হয়।