ভৈৰৱকুণ্ডৰ পৰা উভতি আহোতে শোকাৱহ পথ দুৰ্ঘটনাত অসম আৰক্ষীৰ কনিষ্টবলৰ মৃত্যু

বৃহস্পতিবাৰে নিশা সংঘটিত হোৱা এক শোকাৱহ পথ দুৰ্ঘটনাত সিদ্ধাৰ্থ প্ৰতীম শৰ্মা (২৮) নামৰ অসম আৰক্ষীৰ এগৰাকী কনিষ্টবলে প্ৰাণ হেৰুৱাই।

জানিব পৰা মতে, বৃহস্পতিবাৰে নিশা মটৰ চাইকেল চলাই অহা যুৱকজনে নিয়ন্ত্ৰণ হেৰুৱাই এটা দ খাৱৈত পৰি যায়।

প্ৰত্যক্ষদৰ্শীসকলে আঘাতপ্ৰাপ্ত যুৱকজনক ওদালগুৰি অসামৰিক চিকিৎসালয়লৈ লৈ যায় যদিও চিকিৎসকে তেওঁক মৃত ঘোষণা কৰে।

দুৰ্ঘটনাত মৃত্যু হোৱা আৰক্ষী কনিষ্ঠবল গৰাকীৰ ঘৰ ওদালগুৰি জিলাৰ টংলা চহৰৰ মিলনপুৰত।

ভৈৰৱকুণ্ডৰ পৰা ঘৰলৈ উভতি অহাৰ সময়তে দুৰ্ঘটনাটো সংঘটিত হয় বুলি স্থানীয় ৰাইজে জানিবলৈ দিয়ে।

দুৰ্ঘটনাটোত মটৰ চাইকেলত উঠি অহা সিদ্ধাৰ্থৰ বন্ধু অসীম নাথো আঘাতপ্ৰাপ্ত হয়।

অসীমক আমিনগাঁৱৰ এখন ব্যক্তিগত চিকিৎসালয়ত চিকিৎসা প্ৰদান কৰি থকা হৈছে।

বৰ্তমান অসীম সম্পূৰ্ণৰূপে সংকট মুক্ত বুলি চিকিৎসকে প্ৰকাশ কৰিছে।

আনহাতে, অসম আৰক্ষীত কৰ্মৰত সিদ্ধাৰ্থ প্ৰতীম শৰ্মাৰ মৃত্যুত মিলনপুৰৰ গৃহত শোকৰ ছাঁ পৰিছে।