মেঘালয় সীমান্তত উত্তেজনা: উমখ্ৰীমিৰ পৰা অসমে উঠাই আনিব লগা হ’ল উপ আৰক্ষী চকী

পশ্চিম কাৰ্বি আংলং আৰু মেঘালয় সীমান্তত শুকুৰবাৰে তীব্ৰ উত্তেজনাৰ সৃষ্টি হয়। মেঘালয় সীমান্তত পশ্চিম কাৰ্বি আংলং আৰক্ষীয়ে এটা সীমান্ত উপ আৰক্ষী চকী (BOP )স্থাপন কৰাক কেন্দ্ৰ কৰি মেঘালয়ৰ স্থানীয় ৰাইজে উত্তেজনাময় পৰিৱেশৰ সৃষ্টি কৰে।

যোৱা ১১ জুনত পশ্চিম কাৰ্বি আংলং আৰক্ষী প্ৰশাসনে জেৰিকীণ্ডিং আৰক্ষী থানাৰ অন্তৰ্গত উমখ্ৰীমি গাঁৱত অসম আৰক্ষীৰ এটা সীমান্ত উপ আৰক্ষী চকী (BOP) স্থাপন কৰিছিল। কিন্তু অসমৰ ভূমিত স্থাপন কৰা এই সীমান্ত উপ আৰক্ষী চকী উৎখাত কৰিবলৈ মেঘালয়ৰ ৰাইজ তথা প্ৰশাসন ওলাই আহে।

মেঘালয়ৰ ৰাইজে সীমা নিৰ্ধাৰণ নোহোৱাকৈ সীমান্ত উপ আৰক্ষী চকী (BOP) স্থাপন কৰিব নিদিয়াৰ হুংকাৰ দিয়ে। ইয়াৰ পাছতে কাৰ্বি আংলঙৰ দণ্ডাধীশৰ নেতৃত্বত আৰক্ষী ,চি আৰ পি বাহিনী ঘটনাস্থলীত গৈ উপস্থিত হয় যদিও পৰিস্থিতি নিয়ন্ত্ৰণ কৰিবলৈ ব্যৰ্থ হয়।

অৱশেষত বাধ্য হৈ কাৰ্বি আংলং প্ৰশাসনে আৰক্ষী চকীটো ভাঙি সকলো বয়বস্তু গাড়ীত উঠাই লৈ আহে। এই ঘটনাই অঞ্চলটোত চাঞ্চল্য সৃষ্টি কৰাৰ লগতে এক চেপা উত্তেজনা বিৰাজ কৰে।

ইপিনে, অসমৰ প্ৰশাসনৰ এনে ভূমিকাৰ বিৰুদ্ধে কাৰ্বি  ছাত্ৰ সংগঠনৰ সভাপতি চেমচন টেৰণে তীব্ৰ প্রতিক্ৰিয়া প্ৰকাশ কৰিছে। তেওঁ শীঘ্ৰে অঞ্চলটোত সীমান্ত উপ আৰক্ষী চকীটো (BOP) স্থাপন কৰাৰ দাবী জনায়।

ৰাজ্যখনৰ বিজেপি চৰকাৰ তথা মুখ্য মন্ত্ৰী সৰ্বানন্দ সোণোৱালে জাতি-মাটি-ভেটি ৰক্ষাৰ শ্লোগান দি অহাৰ সময়তে বহিৰ্ৰাজ্যৰ এনে আগ্ৰাসনৰ ঘটনা সংঘটিত হোৱাটো অতি লজ্জাজনক আৰু গৰিহণাযোগ্য বুলি উল্লেখ কৰে তেৰণে। তদুপৰি, এই সন্দৰ্ভত চৰকাৰে কোনো ব্যৱস্থা গ্ৰহণ নকৰিলে পৰৱৰ্তী সময়ত কাৰ্বি ছাত্ৰ সংগঠনে তীব্ৰ আন্দোলন গঢ়ি তুলিব বুলি ছাত্র নেতাগৰকীয়ে লগতে হুংকাৰ দিয়ে।

দীৰ্ঘদিন ধৰি পশ্চিম কাৰ্বি আংলং আৰু মেঘালয়ৰ মাজত চলি অহা এই সীমা বিবাদক লৈ ৰাজ্য চৰকাৰ দুখনে কোনো ব্যৱস্থা গ্ৰহণ নকৰাত স্থানীয় লোকসকল শংকাত দিন নিয়াবলগীয়া হৈছে। তদুপৰি, অসমৰ মাটিত স্থাপন কৰা সীমান্ত উপ আৰক্ষী চকী মেঘালয়ৰ হেঁচাত উঠাই নিবলগীয়া হোৱা ঘটনাই সকলোকে আচৰিত কৰি তুলিছে।