বিহাৰৰ যৌন ব্যৱসায়ৰ পৰা নাবালক-নাবালিকাসহ অসমৰ ১৩গৰাকীক উদ্ধাৰ

মৰিগাওঁ আৰক্ষী আৰু চি আই দিয়ে বিহাৰৰ ম’তিহাৰাত অভিযান চলাই যৌন ব্যৱসায়ীৰ পৰা উদ্ধাৰ কৰিছে নাবালক-নাবালিকাসহ অসমৰ মুঠ ১৩গৰাকী লোকক।

উদ্ধাৰ হোৱাসকলৰ মাজত আছে এজন ১২ বছৰীয়া ল’ৰা আৰু ১২গৰাকী ছোৱালীৰ ভিতৰত ৫গৰাকী নাবালিকা।

বিহাৰ আৰক্ষীৰ সহযোগত অসমৰ পৰা যোৱা দলটোৱে দেওবাৰে ৰাতি অভিযানটো চলাইছিল।

মৰিগাঁৱৰ আৰক্ষী অধীক্ষক স্বপ্ননীল ডেকাৰ উদ্ধৃতিৰে বাতৰিত প্ৰকাশ: “তেওঁলোকক বিহাৰলৈ সৰবৰাহ কৰা হৈছিল আৰু তাত কিছু নৃত্যৰ প্ৰশিক্ষণ দিয়াৰ পিছত বলপূৰ্বক সিহঁতক যৌন ব্যৱসায়ত নমোৱা হয়।”

উদ্ধাৰ হোৱাসকলৰ ঘৰ মৰিগাওঁ, গোলাঘাট আৰু নগাঁৱত বুলি আৰক্ষীৰ ভাষ্যত প্ৰকাশ।

ঘটনা সংক্ৰান্তত অনিল কুমাৰ আৰু দীপক কুমাৰ নামৰ দুজনক গ্ৰেপ্তাৰ কৰা হৈছে।

আৰক্ষীয়ে দুয়োকে দালাল বুলি সন্দেহ কৰিছে আৰু জেৰাৰ পিছত অধিক তথ্য পোহৰলৈ আহিব বুলি আশা প্ৰকাশ কৰিছে।

আৰক্ষী অধীক্ষকজনে জনোৱা মতে, যোৱা ১১ ছেপ্তেম্বৰত গ্ৰেপ্তাৰ কৰা দুজন মানৱ সৰবৰাহকাৰীৰ স্বীকাৰোক্তিৰ ভিত্তিত অভিযানটো চলোৱা হৈছিল।

মানৱ সৰবৰাহকাৰী দুজনক গুৱাহাটীৰ কামাখ্যা ৰে’ল ষ্টে’চনত আটক কৰা হৈছিল।