অসম প্ৰদেশ যুৱ কংগ্ৰেছৰ সভাপতিক গ্ৰেপ্তাৰ দিচপুৰ আৰক্ষীৰ

অসম প্ৰদেশ যুৱ কংগ্ৰেছৰ সভাপতি কামৰুল ইছলাম চৌধুৰীক আজি (২৩ জানুৱাৰী) দিছপুৰ আৰক্ষীয়ে গ্ৰেপ্তাৰ কৰে। যোৱা ১১ ডিচেম্বৰত গুৱাহাটীৰ দিচপুৰত সংঘটিত ‘কা’ বিৰোধী প্ৰতিবাদী কাৰ্যসূচীত ধ্বংসাত্মক কাৰ্য্যত জড়িত থকাৰ সন্দেহত আৰক্ষীয়ে গ্ৰেপ্তাৰ কৰে।

আজি বিয়লি প্ৰায় ৩ বজাত গ্ৰেপ্তাৰ কৰা কামৰুল ইছলামৰ বিৰুদ্ধে মহানগৰ আৰক্ষীয়ে ইতিমধ্যে এক নিজাববীয়া গোচৰ ৰুজু কৰিছিল।

সেই গোচৰৰ জামিন বিচাৰি আজি কেইজনমান সতীৰ্থসহ কামৰুল দিছপুৰ থানাত উপস্থিত হৈছিল আৰু সেই সময়তে আৰক্ষীয়ে তেওঁক গ্ৰেপ্তাৰ কৰে।

অসম প্ৰদেশ যুৱ কংগ্ৰেছৰ এক সূত্ৰই নৰ্থ-ইষ্ট নাওক এই কথা জনায়। বাতৰি যুগুত কৰা সময়ত কামৰুলক ইছলাম চৌধুৰীক দিচপুৰ থানাত সোধা পোচা চলাই থকা হৈছে। কাইলৈ তেওঁক আদালতত হাজিৰ কৰোৱা হ’ব বুলি আৰক্ষী সূত্ৰই জনায়।

উল্লেখযোগ্য যে দিচপুৰৰ উক্ত প্ৰতিবাদী কাৰ্যসূচীৰ কেইদিনমান পিছতে মন্ত্ৰী হিমন্ত বিশ্ব শৰ্মাই এখন সংবাদমেলত কামৰুলৰ ফ’টো, ভিডিও প্ৰদৰ্শন কৰিছিল। দিছপুৰ, গণেশগুৰি অঞ্চলত প্ৰতিবাদৰ সময়ত হোৱা ধ্বংসাত্মক কাৰ্য্য কামৰুলৰ নেতৃত্বত হোৱা বুলি তেওঁ অভিযোগ তুলিছিল।